மகாராஷ்டிர மாநிலத்தில், தற்போதைய சூழ்நிலையில், கொரோனா நான்காம் அலைக்கு வாய்ப்பு இல்லை என, அம்மாநில சுகாதாரத் துறை அமைச்சர் ராஜேஷ் தோப் தெரிவித்து உள்ளார்.
இந்தியா இதுவரை, கொரோனா வைரஸ் தொற்றின் மூன்று அலைகளை சந்தித்து விட்டது. இதில் இரண்டாம் அலை நாடு முழுவதும் கடும் பாதிப்புகளை ஏற்படுத்தி விட்டது. நாட்டிலேயே கொரோனா வைரஸ் தொற்றால் அதிகம் பாதிக்கப்பட்ட மாநிலம்
மகாராஷ்டிரா
. இந்த மாநிலத்தில் தான், கொரோனா வைரஸ் பாதிப்பும், உயிரிழப்பும் அதிகம். இதைத் தொடர்ந்து தமிழகம், டெல்லி ஆகிய மாநிலங்கள் உள்ளன.
இந்நிலையில், மகாராஷ்டிர மாநிலம் நாக்பூரில், செய்தியாளர்களிடம் அம்மாநில சுகாதாரத் துறை அமைச்சர் ராஜேஷ் தோப் பேசியதாவது:
கொரோனா வைரஸ் தொற்றில் இருந்து குணம் அடைவோரின் எண்ணிக்கை தொடர்ந்து அதிகரித்து வருகிறது. மேலும், மாநிலத்தில் கொரோனா தடுப்பூசி போடும் பணிகள் முழு வீச்சில் நடைபெற்று வருகின்றன. தற்போதைய சூழ்நிலையில், மாநிலத்தில், கொரோனா நான்காம் அலைக்கு வாய்ப்பு இல்லை. கொரோனா வைரஸ் தொற்றை எதிர்கொள்ள மாநில அரசு தயார் நிலையில் உள்ளது.
பூஸ்டர் டோஸ் தடுப்பூசி அனைவருக்கும் கட்டாயம் இல்லை. எனினும், சுகாதார மற்றும் முன்களப் பணியாளர்கள், அத்தியாவசிய சேவை ஊழியர்கள் மற்றும் மூத்த குடிமக்களுக்கு மத்திய அரசின் வழிகாட்டுதல்களின்படி பூஸ்டர் டோஸ் தடுப்பூசிகள் போடப்பட்டு வருகின்றன.
இவ்வாறு அவர் கூறினார்.
நாடாளுமன்ற மாநிலங்களவைத் தேர்தலில், சம்பாஜிராஜே சத்ரபதியை ஆதரிப்பது குறித்த கேள்விக்கு பதில் அளித்த அமைச்சர் ராஜேஷ் தோப், “சாம்பாஜிராஜை மதிக்கிறோம். அவருக்கு ஆதரவளிப்பது குறித்து மகாராஷ்டிரா முதல்வர் உத்தவ் தாக்கரே, தேசியவாத காங்கிரஸ் சரத் பவார் ஆகியோர் இணைந்து இறுதி முடிவை எடுப்பார்கள்” எனத் தெரிவித்தார்.