காங்கிரஸ் கட்சியில் இருந்து விலகிய ஹர்திக் படேல், வரும் 2 ஆம் தேதி பாரதிய ஜனதா கட்சியில் இணைய உள்ளதாக தகவல் வெளியாகி உள்ளது.
குஜராத் மாநிலத்தில், முதலமைச்சர் பூபேந்திர படேல் தலைமையிலான பாரதிய ஜனதா கட்சி ஆட்சி நடைபெற்று வருகிறது. இந்த மாநிலத்தில், இந்த ஆண்டு இறுதியில், சட்டப்பேரவைத் தேர்தல் நடைபெற உள்ளது. பாஜகவின் கோட்டையாக கருதப்படும் குஜராத் மாநிலத்தில், இந்த முறை எப்படியாவது ஆட்சியை பிடித்து விட வேண்டும் என்பதில், எதிர்க்கட்சியான காங்கிரஸ் தீவிரமாக உள்ளது. இதே போல், ஆட்சியை தக்க வைக்க வேண்டும் என்ற நோக்கில், ஆளும்
பாஜக
பம்பரமாக செயல்பட்டு வருகிறது.
கடந்த மே மாதம் 19 ஆம் தேதி, குஜராத் மாநில காங்கிரஸ் கட்சியின் செயல் தலைவராக இருந்த ஹர்திக் படேல், கட்சித் தலைமை மீது ஏற்பட்ட அதிருப்தி காரணமாக, தனது பதவியை ராஜினாமா செய்தார். மேலும் இது தொடர்பான ராஜினாமா கடிதத்தையும் அவர் மேலிடத்திற்கு அனுப்பி இருந்தார். அதில், குஜராத் மாநிலத்தின் எதிர்கால வளர்ச்சிக்காக பணிபுரிவேன் என்றும், மத்திய அரசின் பல்வேறு நலத்திட்டங்களுக்கு காங்கிரஸ் முட்டுக் கட்டையாக இருப்பதாகவும் குறிப்பிட்டிருந்தார்.
இந்நிலையில், காங்கிரஸ் கட்சியில் இருந்து விலகிய ஹர்திக் படேல், வரும் 2 ஆம் தேதி, பாஜகவில் இணைய உள்ளதாக தகவல் வெளியாகி உள்ளது. இது தொடர்பாக குஜராத் மாநில பாஜக செய்தித் தொடர்பாளர் யக்னேஷ் டாவே கூறுகையில், “குஜராத் மாநில காங்கிரஸ் தலைவர் சி.ஆர்.பாட்டில் முன்னிலையில், வரும் 2 ஆம் தேதி, ஹர்திக் படேல் பாஜகவில் இணைய உள்ளார்” என தெரிவித்தார். இதன் மூலம் படேல் சமூகத்தினர் வாக்கு வங்கி பாஜகவுக்கு கிடைக்கும் என எதிர்பார்க்கப்படுகிறது.