BJP received Rs 477 crore worth of contributions in FY 21, Congress Rs 74.5 crore: ECI: 2020-21 நிதியாண்டில் ரூ.20,000க்கு மேல் பெறப்பட்ட நன்கொடைகள் குறித்து இந்திய தேர்தல் ஆணையத்திடம் கட்சிகள் சமர்ப்பித்த அறிக்கைகளின்படி பாஜக ரூ.477.54 கோடி மதிப்பிலான நன்கொடைகளைப் பெற்றுள்ளது, அதே நேரத்தில் காங்கிரஸ் ரூ.74.5 கோடியைப் பெற்றுள்ளது.
தேர்தல் ஆணையம் செவ்வாய்க்கிழமை பொது தளத்தில் வெளியிட்ட இரு கட்சிகளின் பங்களிப்பு அறிக்கையின்படி, பல்வேறு நிறுவனங்கள், தேர்தல் அறக்கட்டளைகள் மற்றும் தனிநபர்களிடமிருந்து பாஜக ரூ.4,77,54,50,077 பெற்றுள்ளது. 2020-21 நிதியாண்டுக்கான பங்களிப்பு அறிக்கையை இந்த ஆண்டு மார்ச் 14 அன்று தேர்தல் ஆணையத்திடம் பாஜக தாக்கல் செய்தது.
ஜனநாயக சீர்திருத்தங்களுக்கான சங்கத்தின் (ADR) அறிக்கையின்படி, 2020-21 ஆம் ஆண்டில் பங்களிப்புகளைப் பெறுவதாக அறிவித்த ஏழு தேர்தல் அறக்கட்டளைகளும், கார்ப்பரேட்கள் மற்றும் தனிநபர்களிடமிருந்து மொத்தம் ரூ. 258.4915 கோடியைப் பெற்றதாகவும், பல்வேறு அரசியல் கட்சிகளுக்கு ரூ.258.4301 கோடி விநியோகித்ததாகவும் கூறியுள்ளது. இவற்றில், அனைத்துக் கட்சிகளும் எலெக்டோரல் டிரஸ்ட்களிடமிருந்து பெற்ற மொத்த நன்கொடைகளில் 82.05 சதவீதம் அல்லது 212.05 கோடியை பாஜக பெற்றுள்ளது என்று அறிக்கை குறிப்பிட்டுள்ளது.
மிகப்பெரிய தேர்தல் அறக்கட்டளைகளில் ஒன்றான ப்ரூடென்ட் எலெக்டோரல் டிரஸ்ட், பாஜகவுக்கு ரூ. 209.00 கோடி நன்கொடையாக அளித்துள்ளது, இது 2019-20ஆம் ஆண்டில் ரூ.217.75 கோடியை வழங்கியது, அதேநேரம், ஜெயபாரத் எலெக்டோரல் டிரஸ்ட் தனது மொத்த வருமான ரூ.2 கோடியை 2020-21ல் பாஜகவுக்கு வழங்கியுள்ளது. பிஜேபி, ஜேடியு, ஐஎன்சி, என்சிபி, ஆர்ஜேடி, ஏஏபி மற்றும் எல்ஜேபி ஆகிய ஏழு அரசியல் கட்சிகளுக்கு ப்ரூடென்ட் எலெக்டோரல் டிரஸ்ட் நன்கொடை அளித்துள்ளது.
2020 நிதியாண்டில், 2019-20ல் கட்சிகளால் ரூ.3,429.56 கோடி மதிப்புள்ள தேர்தல் பத்திரங்கள் பணமாக்கப்பட்டன, மேலும் இதில் 87.29 சதவீதத்தை நான்கு தேசியக் கட்சிகளான பிஜேபி, காங்கிரஸ், டிஎம்சி மற்றும் என்சிபி பெற்றதாக ஏடிஆர் தெரிவித்துள்ளது.
இதையும் படியுங்கள்: கட்டணமே இல்லாமல் தபாலில் கோவில்பட்டி கடலை மிட்டாய்: அஞ்சல் துறை சிறப்பு ஏற்பாடு
2019-20 நிதியாண்டில் பாஜக தனது மொத்த வருமானம் ரூ. 3,623.28 கோடி என்று அறிவித்தது, ஆனால் அதில் 45.57 சதவீதத்தை (ரூ. 1,651.022 கோடி) மட்டுமே செலவிட்டதாகவும், அதே காலகட்டத்தில் காங்கிரஸின் மொத்த வருமானம் ரூ. 682.21 கோடி என்றும் ஏடிஆர் கூறியுள்ளது. காங்கிரஸ் கட்சி கடந்த ஆண்டில் ரூ.998.158 கோடியை செலவிட்டுள்ளது, இது அந்த ஆண்டு வருமானத்தை விட 46.31 சதவீதம் அதிகமாகும்.
