விசா முறைகேடு வழக்கில், காங்கிரஸ் நாடாளுமன்ற உறுப்பினர் கார்த்தி சிதம்பரத்தின் முன்ஜாமின் மனு தள்ளுபடி செய்யப்பட்டதை அடுத்து, அவர் எந்நேரத்திலும் கைது செய்யப்பட வாய்ப்பு இருப்பதாக தகவல் வெளியாகி உள்ளது.
காங்கிரஸ் கட்சியின் மூத்தத் தலைவரும், முன்னாள் மத்திய நிதித் துறை அமைச்சருமான ப.சிதம்பரம், முந்தைய காங்கிரஸ் ஆட்சிக் காலத்தில் ஆட்சி அதிகாரத்தில் இருந்த போது, அவரது மகனும், காங்கிரஸ் நாடாளுமன்ற உறுப்பினருமான கார்த்தி சிதம்பரம், சீனர்களுக்கு முறைகேடாக விசா பெற்றுத் தந்ததாக குற்றச்சாட்டு எழுந்தது. இதற்காக அவர், பல லட்சம் ரூபாய் பணத்தை லஞ்சமாக பெற்றதாகவும் கூறப்பட்டது.
இந்நிலையில், கடந்த சில நாட்களுக்கு முன்பு, விசா முறைகேடு விவகாரம் தொடர்பாக, கார்த்தி சிதம்பரம் மீது அமலாக்கத் துறை அதிகாரிகள் வழக்குப் பதிவு செய்தனர். பின்னர், அவரது தந்தை ப.சிதம்பரம் மற்றும் அவருக்கு சொந்தமான வீடு மற்றும் அலுவலகங்களில் அதிரடியாக சோதனை நடத்தினர். அப்போது பல முக்கிய ஆவணங்கள் கைப்பற்றப்பட்டதாக தகவல் வெளியாகியது.
இதைத் தொடர்ந்து, சென்னையில், கார்த்தி சிதம்பரத்தின் ஆடிட்டரை, அமலாக்கத் துறை அதிகாரிகள் நீண்ட நேர விசாரணைக்கு பின்னர் கைது செய்தனர். இது குறித்து கருத்துத் தெரிவித்த கார்த்தி சிதம்பரம், அமலாக்கத் துறை தெரிவிக்கும் குற்றச்சாட்டுகளில் உண்மை இல்லை என கூறினார்.
இதற்கிடையே, விசா முறைகேடு வழக்கில் முன்ஜாமின் கோரி, டெல்லி சிபிஐ நீதிமன்றத்தில் கார்த்தி சிதம்பரம் தரப்பில் மனு தாக்கல் செய்யப்பட்டு இருந்தது. இந்த மனு மீதான விசாரணை இன்று நடைபெற்றது. அப்போது, கார்த்தி சிதம்பரத்தின் முன்ஜாமின் மனுவை தள்ளுபடி செய்து சிபிஐ சிறப்பு நீதிமன்றம் உத்தரவு பிறப்பித்தது. இதன் மூலம் இந்த வழக்கில், கார்த்தி சிதம்பரம் எந்நேரத்திலும் கைது செய்யப்பட வாய்ப்பு இருப்பதாக தகவல் வெளியாகி உள்ளது.