மருத்துவ வரலாற்றில் முதல் முறையாக மலக்குடல் புற்றுநோயால் பாதிக்கப்பட்ட ஒரு சிறிய குழு அதிசயமாக ஒரு பரிசோதனை சிகிச்சைக்குப் பிறகு முழுமையாக குணமடைந்துள்ளனர்.
நியூயார்க் டைம்ஸில் வெளியான செய்தியின்படி, மிகச் சிறிய மருத்துவ பரிசோதனையில், 18 நோயாளிகள் ஆறு மாதங்களுக்கு Dostarlimab என்ற மருந்தை உட்கொண்டனர், இறுதியில், அவர்கள் ஒவ்வொருவரும் தங்கள் கட்டிகள் மறைவதைக் கண்டனர் என்று தெரிவிக்கப்பட்டுள்ளது.
டோஸ்டார்லிமாப் (Dostarlimab) என்பது மனித உடலில் மாற்று ஆன்டிபாடிகளாக செயல்படும் ஆய்வகத்தில் தயாரிக்கப்பட்ட மூலக்கூறுகளைக் கொண்ட ஒரு மருந்தாகும்.
இந்த ஒரே மருந்து பரிசோதனையில் பங்கேற்ற 18 மலக்குடல் புற்றுநோயாளிகளுக்கும் வழங்கப்பட்டது. இந்த சிகிச்சையின் விளைவாக, ஒவ்வொரு நோயாளிக்கும், எண்டோஸ்கோபி, பாசிட்ரான் எமிஷன் டோமோகிராபி (PET Scan) அல்லது MRI ஸ்கேன் என எந்த உடல் பரிசோதனை மூலம் கண்டறிய முடியாதபடி புற்றுநோய் முற்றிலும் அழிக்கப்பட்டது.
PC: MSKCC.org
நியூயார்க்கின் மெமோரியல் ஸ்லோன் கெட்டரிங் கேன்சர் சென்டரின் டாக்டர் லூயிஸ் ஏ. டயஸ் ஜே, “புற்றுநோய் வரலாற்றில் இதுவே முதல்முறை” என்று கூறினார்.
நியூயார்க் டைம்ஸ் செய்தியின்படி, மருத்துவ பரிசோதனையில் ஈடுபட்டுள்ள 18 நோயாளிகள் தங்கள் புற்றுநோயை அழிக்க முந்தைய சிகிச்சைகளான கீமோதெரபி, கதிர்வீச்சு மற்றும் குடல், சிறுநீர் மற்றும் பாலியல் செயலிழப்பை ஏற்படுத்தக்கூடிய ஊடுருவும் அறுவை சிகிச்சை போன்றவற்றை எதிர்கொண்டனர். பின்னர் அவர்கள் அடுத்த கட்டமாக இந்த சோதனைக்குச் சென்றனர். ஆனால், இப்போது அவர்களுக்கு மேலும் எந்த சிகிச்சையும் தேவையில்லை என்று கூறப்படுகிறது.
இந்த கண்டுபிடிப்பு தற்போது மருத்துவ உலகில் அதிர்வலைகளை ஏற்படுத்தியுள்ளது.
சோதனைக்காக, நோயாளிகள் ஆறு மாதங்களுக்கு ஒவ்வொரு மூன்று வாரங்களுக்கும் Dostarlimab மருந்தை எடுத்துக் கொண்டனர். அவர்கள் அனைவரும் புற்றுநோயின் ஒரே நிலைகளில் இருந்தனர்.
இப்போது, மருந்தை மதிப்பாய்வு செய்த புற்றுநோய் ஆராய்ச்சியாளர்கள், இந்த சிகிச்சை நம்பிக்கைக்குரியதாகத் தெரிகிறது, ஆனால் இது அதிக நோயாளிகளுக்கு வேலை செய்யுமா மற்றும் புற்றுநோய்கள் உண்மையிலேயே நிவாரணத்தில் உள்ளதா என்பதைப் பார்க்க பெரிய அளவிலான சோதனை தேவை என்று ஊடகங்களுக்குத் தெரிவித்தனர்.