இந்தியாவில் மீண்டும் ஊரடங்கு – பிரதமர் மோடி நடத்தும் ஆலோசனை!

இந்தியாவில், கொரோனா வைரஸ் தொற்று பரவல் அதிகரித்து வரும் நிலையில், மீண்டும் கட்டுப்பாடுகள் அமலாக வாய்ப்பு உள்ளதாக தகவல் வெளியாகி உள்ளது.

தமிழகம், மகாராஷ்டிரா, டெல்லி, கேரளா, கர்நாடகா உள்ளிட்ட பெரும்பாலான மாநிலங்களில், கொரோனா பரவல் மீண்டும் வேகம் எடுத்துள்ளது. இதன் காரணமாக, மகாராஷ்டிரா, தமிழகம் உள்ளிட்ட மாநிலங்களில், பொது இடங்களில் பொது மக்கள் முகக் கவசம் அணிவது மீண்டும் கட்டாயம் ஆக்கப்பட்டு உள்ளது. நாடு முழுவதும் கொரோனா வைரஸ் பாதிப்பு அதிகரித்து வருவதால், நான்காவது அலை தொடங்கி விட்டதா என்ற அச்சம் எழுந்துள்ளது.

இந்நிலையில், இந்தியாவில், கடந்த 24 மணி நேரத்தில், 8,084 பேருக்கு கொரோனா தொற்று உறுதி செய்யப்பட்டு உள்ளது. நேற்று முன்தினம் 8,329 பேருக்கும், நேற்று 8,582 பேருக்கு கொரோனா தொற்று உறுதி செய்யப்பட்டது. இதன் மூலம் கொரோனாவால் பாதிக்கப்பட்டவர்களின் மொத்த எண்ணிக்கை 4 கோடியே 32 லட்சத்து 30ஆயிரத்து 101 ஆக அதிகரித்துள்ளது.

அதே போல் கடந்த 24 மணி நேரத்தில் கொரோனா தொற்றுக்கு 10 பேர் பலியாகி உள்ள நிலையில் கொரோனாவால் ஏற்பட்ட மொத்த உயிரிழப்பு எண்ணிக்கை 5,24,771 ஆக அதிகரித்துள்ளது. மத்திய சுகாதாரத் துறை அமைச்சகம் வெளியிட்டுள்ள மருத்துவ அறிக்கையின்படி, நாடு முழுவதும் தற்போது, 47,995 பேர் கொரோனா தொற்றுக்கு சிகிச்சை பெற்று வருகின்றனர்.

இதற்கிடையே, அதிகரித்து வரும் கொரோனா தினசரி பாதிப்பு குறித்து, மத்திய சுகாதாரத் துறை அமைச்சகத்தின் மூத்த அதிகாரிகளுடன், பிரதமர் நரேந்திர மோடி விரைவில் ஆலோசனை செய்ய உள்ளதாக தகவல் வெளியாகி உள்ளது.

அப்போது, கொரோனா பரவலைக் கட்டுப்படுத்துவது, தடுப்பூசி பணிகளை மேலும் துரிதப்படுத்துவது உள்ளிட்ட விவகாரங்கள் குறித்து விவாதிக்கப்படக் கூடும் எனத் தெரிகிறது. மேலும், கொரோனா பாதிப்பு அதிகம் உள்ள இடங்களில் மட்டும் உள்ளூர் நிர்வாகங்கள் மூலம் கட்டுப்பாடுகளை அமல்படுத்துவது குறித்தும் ஆலோசிக்கப்பட வாய்ப்பு உள்ளதாகக் கூறப்படுகிறது.