மகாராஷ்டிர மாநிலத்தில் பரபரப்பான அரசியல் நிகழ்வுகளுக்கு இடையே, இன்று மாலை 5 மணிக்கு, சிவசேனா கட்சி எம்எல்ஏக்கள் கூட்டம் நடைபெற உள்ளது.
மகாராஷ்டிர மாநிலத்தில், முதலமைச்சர் உத்தவ் தாக்கரே தலைமையிலான சிவசேனா – காங்கிரஸ் – தேசியவாத காங்கிரஸ் ஆகிய கட்சிகளின் கூட்டணி ஆட்சி நடைபெற்று வருகிறது. இந்நிலையில், மாநில அமைச்சராக உள்ள சிவசேனா மூத்தத் தலைவர் ஏக்நாத் ஷிண்டே, கட்சித் தலைமை மீது ஏற்பட்ட அதிருப்தி காரணமாக, தனது ஆதரவு எம்எல்ஏக்களுடன், குஜராத் மாநிலம் சூரத்திற்கு சென்றார். இதைத் தொடர்ந்து, அசாம் மாநிலம் கவுகாத்தில் தற்போது தஞ்சம் அடைந்துள்ளார். இதற்கிடையே, ஏக்நாத் ஷிண்டே கட்சி தலைமை கொறடா பதவியில் இருந்து நீக்கி சிவசேனா உத்தரவிட்டது.
அமைச்சர் ஏக்நாத் ஷிண்டேவுடன், 5 சுயேட்சை எம்எல்ஏக்கள் உட்பட 22 எம்எல்ஏக்கள் உள்ளதாகவும், அவர்கள் யாரையும் தொடர்பு கொள்ள முடியவில்லை என்றும் தகவல் வெளியாகி உள்ளது. இதனால், முதலமைச்சர் உத்தவ் தாக்கரே தலைமையிலான அரசுக்கு நெருக்கடி ஏற்பட்டு உள்ளது. அமைச்சர் உட்பட 22 பேர், கூட்டணி அரசுக்கு அளித்து வரும் ஆதரவை திரும்பப் பெறும் பட்சத்தில், முதலமைச்சர் உத்தவ் தாக்கரே பெரும்பான்மையை இழப்பதோடு மட்டுமல்லாமல், ஆட்சியை பறிகொடுப்பார். இந்த விவகாரம் மகாராஷ்டிர மாநில அரசியலில் புயலைக் கிளப்பி உள்ளது.
இந்நிலையில், பரபரப்பான அரசியல் சூழ்நிலைகளுக்கு இடையே, தலைநகர் மும்பையில் உள்ள முதலமைச்சர் உத்தவ் தாக்கரே இல்லத்தில், இன்று மாலை 5 மணிக்கு, சிவசேனா எம்எல்ஏக்கள் கூட்டம் நடைபெற உள்ளது. இது தொடர்பாக அனைத்து எம்எல்ஏக்களுக்கும் வாட்ஸ் அப், மெயில் மூலம் தகவல் அனுப்பப்பட்டு உள்ளது. இந்தக் கூட்டத்தில் அனைத்து சிவசேனா எம்எல்ஏக்களும் பங்கேற்க வேண்டும் என்றும், இதில் பங்கேற்காத எம்எல்ஏக்கள், கட்சியை விட்டு வெளியேற நினைப்பதாக கருதப்படும் என்றும், உங்கள் உறுப்பினர் பதவி ரத்து செய்யப்படும் என்றும் எச்சரிக்கப்பட்டு உள்ளது.
இதற்கிடையே, பாஜகவிடம் இருந்து எந்த ஆதரவும் வரவில்லை என, சிவசேனா அதிருப்தி எம்எல்ஏ ஏக்நாத் ஷிண்டே தெரிவித்துள்ளார். அனைத்து எம்எல்ஏக்களும் மும்பை திரும்பும் வரை எந்த முடிவும் எடுக்கப்படாது என, சிவசேனா மூத்தத் தலைவர் சஞ்சய் ராவத் குறிப்பிட்டு உள்ளார்.