ஒருமுறை மட்டும் பயன்படுத்தப்பட கூடிய பிளாஸ்டிக்கை முற்றிலுமாக ஒழிக்க உரிய நடவடிக்கைகளை எடுக்கும்படி அனைத்து மாநிலங்களையும் மத்திய அரசு தொடர்ந்து வலியுறுத்தி வந்தது.
இந்நிலையில், ஒருமுறை பயன்படுத்தப்படும் பிளாஸ்டிக் உற்பத்திக்கு ஜூலை 1 ஆம் தேதி முதல் நாடு முழுவதும் தடை விதிக்கப்படுவதாக மத்திய சுற்றுச்சூழல் அமைச்சகம் இன்று அதிரடியாக அறிவித்துள்ளது.
இதன்படி, ஒருமுறை பயன்படுத்தக்கூடிய (மறுசுழற்சி செய்ய இயலாத) குறைவான பயன்பாடு கொண்ட அதிக குப்பையை ஏற்படுத்தக்கூடிய பிளாஸ்டிக் பொருட்களின் உற்பத்தி, விநியோகம், விற்பனை, பயன்பாடு, இறக்குமதி என அனைத்தும் நாடு முழுவதும் ஜூலை 1 ஆம் தேதி முதல் தடை செய்யப்படுவதாக மத்திய அரசு அறிவித்துள்ளது.
மறுசுழற்சி செய்ய இயலாத ஒருமுறை மட்டுமே பயன்படுத்தப்பட கூடிய பிளாஸ்டிக் குப்பையாக சேரும்போது, அது மழைநீரை மண்ணுக்குள் செல்லவிடாமல் தடுப்பதாகவும், அதன் விளைவாக நிலத்தடி நீர்மட்டம் குறைதல் போன்ற பாதிப்புகள் ஏற்படுவதாகவும் நிபுணர்களும், இயற்கை ஆர்வலர்களும் தொடர்ந்து கவலை தெரிவித்து வருகின்றனர்.
அவர்களின் கவலையை தீர்க்கும் விதத்தில் பிளாஸ்டிக் பயன்பாட்டுக்கு தடை விதித்து மத்திய அரசு அதிரடியாக உத்தரவிட்டுள்ளது.