பல்வேறு நிகழ்ச்சிகளில் பங்கேற்பதற்காக, பிரதமர் நரேந்திர மோடி இன்று ஆந்திர மாநிலத்துக்கு வருகை தந்திருந்தார். அவரது பயணத்தின் முக்கிய நிகழ்வாக, ஆந்திர மாநிலம், பீமாவரத்தில் விடுதலைப் போராட்ட வீரர் அல்லூரி சீதாராம ராஜூவின் 125 ஆவது பிறந்தநாள் விழாவில் பிரதமர் மோடி பங்கேற்றார்.
அத்துடன் அவரது 30 அடி உயர வெண்கல சிலையையும் அவர் திறந்து வைத்தார். தொடர்ந்து பல்வேறு அரசு திட்டங்களையும் மோடி தொடங்கி வைத்தார்.
இந்த நிகழ்ச்சியில், மாநில ஆளுநர் பிஸ்வ பூசன் ஹரிசந்தன், மத்திய சுற்றுலா மற்றும் கலாச்சாரத் துறை அமைச்சர் கிஷன் ரெட்டி, ஆந்திர முதல்வர் ஒய். எஸ்.ஜெகன் மோகன் ரெட்டி, தெலுங்கு திரை உலகின் சூப்பர் ஸ்டார் சிரஞ்சீவி உள்ளிட்டோர் பங்கேற்றனர்.
நிகழ்ச்சி முடிந்து பிரதமர் மோடி அங்கிருந்து புறப்பட்டபோது, விழா மேடையில் மோடி அருகே நின்று கொண்டிருந்த பிரபல நடிகையும், ஆந்திர மாநில அமைச்சருமான ரோஜா, அவருடன் செல்ஃபி எடுத்து தனது மகிழ்ச்சியை வெளிப்படுத்தினார்.
பிரதமர் மோடியுடன் அமைச்சர் ரோஜா செல்ஃபி எடுத்து கொண்ட விடியோ சமூக வலைதளங்களில் தற்போது வைரலாகி வருகிறது.
மோடியின் வருகைக்கு எதிர்ப்பு தெரிவித்து ஹைதராபாத் உல்ளிட்ட நகரங்களில் போஸ்டர்கள், ஹோர்டிங்ஸ் வைக்கப்பட்டுள்ள நிலையில், மாநில அமைச்சர் ரோஜா பிரதமருடன் செல்ஃபி எடுத்து கொண்டது குறிப்பிடத்தக்கது.