உலக அளவில் சாதனை படைத்த 'கேஜிஎப்' போஜ்புரி
இந்தியாவில் அதிக மக்களால் பேசப்படும் மொழிகளில் போஜ்புரி மொழியும் ஒன்று. வட இந்தியாவில் உத்தரப்பிரதேசத்தில் 70 மில்லியன், பீகாரில் 80 மில்லியன், மற்ற இந்தியப் பகுதிகளில் 6 மில்லியன் ஆகியவற்றையும் சேர்த்து உலக அளவில் சுமார் 150 மில்லியன் மக்கள் இந்த மொழியைப் பேசுவதாக விக்கிபீடியா தெரிவிக்கிறது.
போஜ்புரி மொழியில் ஏற்கெனவே சில திரைப்படங்கள் வந்துள்ளன. மற்ற மொழிப் படங்களும் அம்மொழியில் டப்பிங் செய்யப்பட்டு வெளியாகி உள்ளன. கன்னடத்தில் வெளிவந்த 'கேஜிஎப்' படத்தின் முதல் பாகம் போஜ்புரி மொழியில் டப்பிங் செய்யப்பட்டு யூடியூபில் 2020ம் வருடக் கடைசியில் வெளியானது.
தற்போது அந்த வீடியோ 600 மில்லியன் பார்வைகளை யூடியூபில் கடந்துள்ளது. உலக அளவில் ஒரு திரைப்படம் இந்த அளவிற்கு பார்வைகளை இதுவரை பெற்றதில்லை. மேலும் இந்த வீடியோவிற்கு 59 லட்சம் லைக்குகளும் கிடைத்துள்ளன. 'கேஜிஎப் 2' படம் போஜ்புரி மொழியில் டப்பிங் செய்யப்பட்டு வெளியாகினாலும் இந்த சாதனை முறியடிக்கப்படுமா என்பது சந்தேகம்தான்.