ஜப்பான் நாட்டின் முன்னாள் பிரதமர் ஷின்சோ அபே மீது மர்ம நபர் துப்பாக்கிச் சுட்டதில் பலத்த காயம் அடைந்தார்.
கிழக்கு ஆசிய நாடான ஜப்பான் நாட்டின் முன்னாள் பிரதமர் ஷின்சோ அபே, 67. இவர் 2012 ஆம் ஆண்டு முதல் 2020 ஆம் ஆண்டு வரை அந்நாட்டின் பிரதமராக பணியாற்றினார். கடந்த 2020 ஆம் ஆண்டு ஆகஸ்ட் மாதம் உடல்நிலை காரணமாக தனது பதவியை ராஜினாமா செய்தார்.
இந்நிலையில், ஜப்பான் நாட்டின் நரா என்ற நகரத்தில், முன்னாள் பிரதமர் ஷின்சோ அபே இன்று நடைபெற்ற பொது நிகழ்ச்சி ஒன்றில் பங்கேற்றார். சாலை பகுதியில் நடைபெற்ற அந்த நிகழ்ச்சியில் ஷின்சோ அபே பேசிக் கொண்டிருந்த போது அவர் மிது திடீரென துப்பாக்கிச் சூடு நடத்தப்பட்டது.
UK PM Boris Johnson resigns: இங்கிலாந்து பிரதமர் போரிஸ் ஜான்சன் ராஜினாமா?
கூட்டத்தில் பங்கேற்ற ஒரு நபர் தான் மறைத்து வைத்திருந்த துப்பாக்கியை கொண்டு ஷின்சோ அபே மீது சுட்டார். அபேவின் முதுகுப் பக்கம் துப்பாக்கிக் குண்டு பாய்ந்தது. இதனால், அவர் ரத்த வெள்ளத்தில் சுருண்டு விழுந்தார். அதையடுத்து, அங்கு பணியில் இருந்த பாதுகாப்பு படையினர் படுகாயம் அடைந்து மயக்க நிலையில் இருந்த ஷின்சோ அபேவை மீட்டு அருகில் உள்ள மருத்துவமனைக்கு சிகிச்சைக்காக கொண்டு சென்றனர்.
மருத்துவமனையில் ஷின்சோ அபேவுக்கு தீவிர சிகிச்சை அளிக்கப்பட்டு வருவதாகவும், அவரது உடல்நிலையில் முன்னேற்றம் எதுவும் இன்றி ஆபத்தான நிலையில் உள்ளதாகவும் உள்ளூர் ஊடகங்கள் தெரிவித்துள்ளன. இதற்கிடையே, முன்னாள் பிரதமர் ஷின்சோ அபேவை துப்பாக்கியால் சுட்ட மர்ம நபரை போலீசார் கைது செய்துள்ளதாக தகவல் வெளியாகி உள்ளது.