ஒய்.எஸ்.ஆர். காங்கிரஸ் கட்சியின் வாழ்நாள் தலைவராக ஜெகன் மோகன் ரெட்டி தேர்வு செய்யப்பட்டு உள்ளார்.
ஒய்.எஸ்.ஆர். காங்கிரஸ் கட்சியின் தலைவரும், ஆந்திர மாநில முதலமைச்சருமான ஜெகன் மோகன் ரெட்டி, கடந்த 2011 ஆம் ஆண்டு மார்ச் மாதம், காங்கிரஸ் கட்சியில் இருந்து விலகி, ஒய்.எஸ்.ஆர். காங்கிரஸ் என்ற கட்சியை உருவாக்கினார். இந்தக் கட்சி உருவானது முதல், அவர் கட்சித் தலைவராக, அவரது தாயார் ஒய்.எஸ்.விஜயம்மா கவுரவத் தலைவராக பதவி வகித்து வருகின்றனர். அதனை தொடர்ந்து கடைசியாக 2017 ஆம் ஆண்டு ஒய்.எஸ்.ஆர். காங்கிரஸ் கட்சியின் தலைவராக, ஜெகன் மோகன் ரெட்டி தேர்ந்தெடுக்கப்பட்டார்.
இந்நிலையில், ஒய்.எஸ்.ஆர். காங்கிரஸ் கட்சியின் பொதுக்குழுக் கூட்டம், அக்கட்சித் தலைவர் ஜெகன் மோகன் ரெட்டி தலைமையில் நடைபெற்றது. இந்தக் கூட்டத்தின் முடிவில், கட்சியின் வாழ்நாள் தலைவராக, ஜெகன் மோகன் ரெட்டி ஒரு மனதாக தேர்வு செய்யப்பட்டார். இதற்காக, கட்சியின் சட்ட விதிகளில் திருத்தம் செய்யப்பட்டு உள்ளது.
இதன்படி, அஇஅதிமுக நிரந்தர பொதுச் செயலாளராக, மறைந்த முன்னாள் முதலமைச்சர் ஜெ.ஜெயலலிதா இருந்தது போல், ஒய்.எஸ்.ஆர். காங்கிரஸ் கட்சியின் நிரந்தரத் தலைவராக, ஜெகன் மோகன் ரெட்டி இருப்பார். இதற்கிடையே, ஒய்.எஸ்.ஆர். காங்கிரஸ் கட்சியின் கவுரவத் தலைவர் பதவியை, தாயார் விஜயம்மா ராஜினாமா செய்தார்.
இது குறித்து விளக்கம் அளித்த அவர், “அண்டை மாநிலமான தெலங்கானாவில் ‘ஒய்எஸ்ஆர் தெலங்கானா’ கட்சிக்கு தலைமை தாங்கும் தனது மகள் ஷர்மிளாவுக்கு ஆதரவாக ஒய்எஸ்ஆர் காங்கிரஸ் கட்சியில் இருந்து விலகுகிறேன்” என தெரிவித்தார்.
அடுத்த கட்டமாக, ஜெகன் மோகன் ரெட்டி, வாழ்நாள் முழுவதும் கட்சித் தலைவராக இருக்க, ஒய்எஸ்ஆர் காங்கிரஸ் கட்சி தரப்பில், இந்திய தேர்தல் ஆணையத்திடம் முறைப்படி ஒப்புதலைப் பெற வேண்டும் என்பது குறிப்பிடத்தக்கது.