சமந்தாவைக் குறிப்பிடுகிறதா நாகசைதன்யாவின் 'தேங்க் யூ' வசனம்
தமிழில் சூர்யா நடித்த '24' படத்தை இயக்கிய விக்ரம் குமார் இயக்கத்தில், தமன் இசையமைப்பில், பி.சி.ஸ்ரீராம் ஒளிப்பதிவில், நாக சைதன்யா, ராஷி கண்ணா, 'குக்கூ' படக் கதாநாயகி மாளவிகா நாயர் மற்றும் பலர் நடிக்கும் படம் தெலுங்குப் படம் 'தேங்க் யூ'.
இப்படத்தின் டிரைலர் நேற்று வெளியிடப்பட்டது. காதல் திரைப்படமாக உருவாகியுள்ள இப்படத்தின் டிரைலரில் உள்ள ஒரு வசனம் புதிய சர்ச்சையை ஏற்படுத்தியுள்ளது. இது சமந்தா உடனான, நாக சைதன்யாவின் முறிந்து போன காதல் திருமண வாழ்க்கையைப் பற்றிக் குறிப்பிடுவதாக உள்ளது என ரசிகர்கள் பலரும் கருத்து தெரிவித்துள்ளார்கள்.
டிரைலரில் உள்ள ஒரு வசனத்தில், “உறவில் இருக்கும் ஒருவரைக் கட்டுப்படுத்தும் காதலை விட, விட்டுக் கொடுக்கும் காதல் சிறந்தது” என இருக்கிறது. நாக சைதன்யா, சமந்தா இருவரும் மனமுவந்து பிரிந்தார்கள். இருவரில் யார் விட்டுக் கொடுத்தது என்பதில் நாக சைதன்யாவின் ரசிகர்கள் அவர்தான் விட்டுக் கொடுத்ததாகச் சொல்லி வருகிறார்கள். மேலும், சமந்தாவை டேக் செய்தும் இந்த டிரைலரைப் பார்க்கும்படி கேட்டுள்ளார்கள்.