தொலைக்காட்சி மற்றும் சமூக ஊடகங்களில் விவாதங்கள் என்ற பெயரில் கட்ட பஞ்சாயத்துகள் நடைபெறுவதாக, உச்ச நீதிமன்ற தலைமை நீதிபதி என்.வி.ரமணா குற்றம் சாட்டி உள்ளார்.
ஜார்க்கண்ட் மாநிலத் தலைநகர் ராஞ்சியில் நடைபெற்ற விழா ஒன்றில் கலந்து கொண்டு, உச்ச நீதிமன்றத் தலைமை நீதிபதி என்.வி.ரமணா பேசியதாவது:
தொலைக்காட்சி மற்றும் சமூக ஊடகங்களில் நடைபெறும் விவாதங்கள், நாட்டை பின்னோக்கி கொண்டு செல்கின்றன. நீதிபதிகளுக்கு எதிராக சமூக ஊடகங்களில் ஒருங்கிணைக்கப்பட்ட பிரசாரங்கள் நடைபெறுகின்றன. நீதிபதிகள் உடனடியாக எதிர்வினையாற்ற மாட்டார்கள். தயவு செய்து அதை பலவீனம் என்று தவறாக நினைக்காதீர்கள்.
புதிய ஊடகக் கருவிகள் மகத்தான திறனைக் கொண்டுள்ளன. ஆனால் சரி மற்றும் தவறு, நல்லது மற்றும் கெட்டது மற்றும் உண்மையானது மற்றும் போலியானவை ஆகியவற்றை வேறுபடுத்திப் பார்க்க இயலாது. ஊடக விசாரணைகள், வழக்குகளை தீர்ப்பதில் வழிகாட்டும் காரணியாக இருக்க முடியாது.
ஊடகங்கள் கட்ட பஞ்சாயத்து நடத்துவதை நாம் பார்க்கிறோம். சில சமயங்களில் அனுபவம் வாய்ந்த நீதிபதிகள் கூட முடிவெடுப்பது கடினம். நீதி வழங்குவது சம்பந்தப்பட்ட பிரச்னைகள் பற்றிய தவறான தகவல் மற்றும் நிகழ்ச்சி நிரல் சார்ந்த விவாதங்கள் ஜனநாயகத்தின் ஆரோக்கியத்திற்கு கேடு விளைவிப்பது நிரூபணமாகிறது.
ஊடகங்களால் பரப்பப்படும் பாரபட்சமான கருத்துக்கள் ஜனநாயகத்தை பலவீனப்படுத்துவதாகவும், அமைப்பு முறைக்கு கேடு விளைவிப்பதாகவும் உள்ளது. இந்த செயல்பாட்டில், நீதி வழங்குவது மோசமாக பாதிக்கப்படுகிறது. உங்கள் பொறுப்பை மீறுவதன் மூலம், நீங்கள் ஜனநாயகத்தை இரண்டு படிகள் பின்னோக்கி கொண்டு செல்கிறீர்கள்.
முற்றிலும் பொறுப்பற்ற முறையில் மின்னணு ஊடகம் செயல்படுகிறது. சமூக ஊடகம் அதை விட மோசமாக செயல்படுகிறது. எனவே, ஊடகம் சுய பரிசோதனை செய்து கொள்வதே சிறப்பு. என்ன பேசுகிறோம் என்பதை தெரிந்து பேசுங்கள். மின்னணு மற்றும் சமூக ஊடகங்கள் பொறுப்புடன் செயல்பட வேண்டும் என கேட்டு கொள்கிறேன். தங்களின் குரல் மூலம் மக்களுக்கு கற்பித்து நாட்டை ஆற்றல் மிக்கதாக மாற்றுங்கள்.
இவ்வாறு அவர் கூறினார்.
உச்ச நீதிமன்ற தலைமை நீதிபதி என்.வி.ரமணா அடுத்த மாதம் ஓய்வு பெற உள்ளார் என்பது குறிப்பிடத்தக்கது.