அக்னி வீரர்களின் எதிர்காலம் எப்படி இருக்கும் என, பிரதமர் நரேந்திர மோடிக்கு, காங்கிரஸ் நாடாளுமன்ற உறுப்பினர் ராகுல் காந்தி கேள்வி எழுப்பி உள்ளார்.
முப்படைகளில் இளைஞர்களுக்கு 4 ஆண்டுகள் பணி என்ற அடிப்படையில் ஆட்சேர்க்கும் அக்னிபத் திட்டத்தை மத்திய அரசு கொண்டு வந்துள்ளது. இதற்கு வட மாநிலங்களில் எதிர்ப்பு எழுந்துள்ள நிலையில் அக்னிபத் திட்டத்தின் கீழ் ஆட்சேர்க்கும் நடைமுறைகளை ராணுவம், கடற்படை தொடங்கி விட்டது. இதற்கான அறிவிப்புகளை முப்படைகளும் வெளியிட்டு உள்ளன.
இதற்கிடையே, அக்னிபத் திட்டத்திற்கு காங்கிரஸ் உள்பட பல்வேறு எதிர்க்கட்சிகள் எதிர்ப்பு தெரிவித்து உள்ளன. இந்த திட்டத்தை கைவிடக் கோரி காங்கிரஸ் சார்பில் குடியரசுத் தலைவர் ராம்நாத் கோவிந்திடம் முறையீடு செய்யப்பட்டு உள்ளது.
இந்நிலையில், அக்னிபத் திட்டம் தொடர்பாக பிரதமர் நரேந்திர மோடிக்கு காங்கிரஸ் நாடாளுமன்ற உறுப்பினர் ராகுல் காந்தி கேள்வி எழுப்பி உள்ளார்.
இது தொடர்பாக, சமூக வலைதளமான ட்விட்டரில், அவர் வெளியிட்டுள்ள பதிவில், “ஒவ்வொரு ஆண்டும் 60 ஆயிரம் ராணுவ வீரர்கள் ஓய்வு பெறுகிறார்கள். அதில் வெறும் 3,000 பேருக்குத் தான் அரசு வேலை கிடைக்கிறது. 4 வருடங்களுக்குப் பிறகு ஒவ்வொரு ஆண்டும் வெளி வரும் ஆயிரக்கணக்கான அக்னி வீரர்கள் எதிர்காலம் எப்படி இருக்கும்? பிரதமரின் இந்த புதிய ஆராய்ச்சியால் நாட்டுக்கும் பாதுகாப்புக் குறைவு, இளைஞர்களின் எதிர்காலமும் ஆபத்தில் முடிகிறது” என பதிவிட்டு உள்ளார்.