டெல்லியில் தர்ணாவில் ஈடுபட்ட ராகுல் காந்தி உட்பட 18 எம்பிக்களை போலீசார் கைது செய்தனர்.
நேஷனல் ஹெரால்டு வழக்கில் நடைபெற்ற சட்ட விரோதப் பணப் பரிமாற்றம் தொடர்பாக, காங்கிரஸ் கட்சி இடைக்காலத் தலைவர் சோனியா காந்தி, அவரது மகனும், நாடாளுமன்ற உறுப்பினருமான ராகுல் காந்திக்கு அமலாக்கத் துறை அதிகாரிகள் சம்மன் அனுப்பினர். இதன்படி, ராகுல் காந்தியிடம் கடந்த மாதத்தில், தொடர்ந்து ஐந்து நாட்கள், டெல்லியில் உள்ள அலுவலகத்தில், அமலாக்கத் துறை அதிகாரிகள் துருவி துருவி விசாரணை நடத்தினர்.
கொரோனா தொற்றால் சோனியா காந்தி பாதிக்கப்பட்டதால், அவர் விசாரணைக்கு ஆஜராவதில் இருந்து விலக்களிக்கப்பட்டது. தற்போது அவர் கொரோனா தொற்றில் இருந்து பூரண குணம் அடைந்துள்ளதால், வழக்கு விசாரணைக்கு நேரில் ஆஜராகும்படி, அமலாக்கத் துறை அதிகாரிகள் புதிய சம்மன் அனுப்பினர். இதன்படி நேற்று, டெல்லியில் உள்ள அமலாக்கத் துறை அலுவலகத்தில் விசாரணைக்காக சோனியா காந்தி ஆஜரானார். இதைத் தொடர்ந்து இன்றும் விசாரணைக்கு வரும்படி அவருக்கு சம்மன் அனுப்பப்பட்டது.
இந்நிலையில், டெல்லியில் உள்ள அமலாக்கத் துறை அலுவலகத்திற்கு, சோனியா காந்தி இன்று வந்தார். அவருடன், ராகுல் காந்தி, பிரியங்கா காந்தி ஆகியோர் உடனிருந்தனர். விசாரணைக்கு சோனியா காந்தி சென்ற நிலையில், விசாரணை அமைப்புகள் அரசியல் பழிவாங்கலுக்காக பயன்படுத்துவதாகக் கூறி, ராகுல் காந்தி தலைமையில் காங்கிரஸ் எம்பிக்கள் பேரணியாக சென்றனர்.
குடியரசுத் தலைவர் மாளிகையை நோக்கி அவர்கள் பேரணியாகச் சென்றனர். அப்போது போலீசார் அவர்களுக்கு அனுமதி மறுத்தனர். இதைத் தொடர்ந்து சாலையில் அமர்ந்து ராகுல் காந்தி தர்ணாவில் ஈடுபட்டார். அப்போது அவர் உட்பட 18 எம்பிக்களை கைது செய்து போலீசார் வாகனத்தில் ஈடுபட்டனர். இதனால் அப்பகுதியில் சிறிது நேரம் பரபரப்பு ஏற்பட்டது.