மத்திய அமைச்சர் ஸ்மிருதி இரானி மற்றும் அவரது மகளுக்கு எதிரான ட்வீட்களை, 24 மணி நேரத்திற்குள் நீக்கும்படி, காங்கிரஸ் தலைவர்களுக்கு டெல்லி உயர் நீதிமன்றம் உத்தரவு பிறப்பித்து உள்ளது.
பாஜகவைச் சேர்ந்த மத்திய பெண்கள் மற்றும் குழந்தைகள் நலத் துறை அமைச்சர் ஸ்மிருதி இரானியின், 18 வயது மகள், பாஜக ஆளும் கோவா மாநிலத்தில், சட்ட விரோதமாக பார் ஒன்றை நடத்தி வருவதாக, காங்கிரஸ் தலைவர்கள் ஜெய்ராம் ரமேஷ், பவன் கேரா மற்றும் நெட்டா டிசோசா ஆகியோர், சமூக வலைதளமான ட்விட்டரில் வீடியோ மற்றும் கருத்துகளை பதிவிட்டு இருந்தனர்.
இது குறித்து விளக்கம் அளித்த மத்திய அமைச்சர் ஸ்மிருதி இரானி, “காங்கிரஸ் தலைவர்கள் வேண்டுமென்றே கல்லூரியில் படிக்கும் தனது மகளின் பெயருக்கு அவதூறு பரப்புகின்றனர்” என்று குற்றம் சாட்டி இருந்தார். மேலும் இது தொடர்பாக, டெல்லி உயர் நீதிமன்றத்தில், காங்கிரஸ் தலைவர்கள் ஜெய்ராம் ரமேஷ், பவன் கேரா மற்றும் நெட்டா டிசோசா ஆகியோரிடம் 2 கோடி ரூபாய் நஷ்ட ஈடு கேட்டு அவதூறு வழக்கு தாக்கல் செய்திருந்தார்.
இந்நிலையில் இன்று, டெல்லி உயர் நீதிமன்றத்தில் இந்த வழக்கு விசாரணைக்கு வந்தது. இதை விசாரித்த உயர் நீதிமன்ற நீதிபதி மினி புஷ்கர்ணா, மத்திய அமைச்சர் ஸ்மிருதி இரானி மற்றும் அவரது மகளுக்கு எதிராக ட்விட்டரில் பதிவிட்ட கருத்துக்களை 24 மணி நேரத்திற்குள் நீக்கும்படி, காங்கிரஸ் தலைவர்கள் ஜெய்ராம் ரமேஷ், பவன் கேரா மற்றும் நெட்டா டிசோசா ஆகியோருக்கு உத்தரவிட்டார்.
மேலும், ட்வீட்களை காங்கிரஸ் தலைவர்கள் நீக்காவிட்டால், ட்விட்டர் நிறுவனம் அந்த ட்வீட்களை நீக்க வேண்டும் என உத்தரவிட்ட நீதிபதி, வரும் 18 ஆம் தேதி இந்த வழக்கில் காங்கிரஸ் தலைவர்கள் நீதிமன்றத்தில் நேரில் ஆஜராக வேண்டும் என்றும் உத்தரவிட்டார்.
டெல்லி உயர் நீதிமன்ற உத்தரவு குறித்து கருத்துத் தெரிவித்துள்ள காங்கிரஸ் தலைவர் ஜெய்ராம் ரமேஷ், “ஸ்மிருதி இரானி தொடர்ந்துள்ள வழக்குக்கு முறைப்படி பதில் அளிக்குமாறு டெல்லி உயர் நீதிமன்றம் நோட்டீஸ் அனுப்பி உள்ளது. நீதிமன்றத்தில் உண்மைகளை முன்வைப்போம்” என கூறினார்.