‘ஒளிமிகு இந்தியா ஒளிமயமான எதிர்காலம் – மின்சாரம் @2047’ திட்டத்தின் நிறைவு விழாவில் பிரதமர் நரேந்திர மோடி காணொலி மூலம் பங்கேற்றார். நிகழ்ச்சியின் போது, புதுப்பிக்கப்பட்ட விநியோகத் துறை திட்டத்தை அவர் தொடங்கி வைத்தார். தேசிய அனல்மின்கழகத்தின் பல்வேறு பசுமை ஆற்றல் திட்டங்களுக்கு அடிக்கல் நாட்டினார். தேசிய சூரியசக்தி தளத்தையும் அவர் தொடங்கிவைத்தார். பல்வேறு திட்டங்களின் பயனாளிகளுடனும் அப்போது பிரதமர் மோடி கலந்துரையாடினார்.
நிகழ்ச்சியில் உரையாற்றிய பிரதமர், அடுத்த 25 ஆண்டுகளில் இந்தியாவின் முன்னேற்றத்தை விரைவுபடுத்துவதில் எரிசக்தி மற்றும் மின் துறைகளுக்கு பெரும் பங்கு உள்ளது. எரிசக்தித் துறையின் பலம், தொழில் தொடங்குவதற்கும், எளிதாக வாழ்வதற்கும் முக்கியமானது. இன்று தொடங்கப்பட்ட திட்டங்கள், மாவட்டத்தின் பசுமை ஆற்றல் மற்றும் எரிசக்தி பாதுகாப்பின் திசையில் குறிப்பிடத்தக்க படிகள். இந்தத் திட்டங்கள் இந்தியாவின் புதுப்பிக்கத்தக்க எரிசக்தி இலக்குகள், அர்ப்பணிப்பு மற்றும் அதன் பசுமை இயக்கத்தின் அபிலாஷைகளை வலுப்படுத்தும் என்றார்.
லடாக் மற்றும் குஜராத்தில் இரண்டு பெரிய பசுமை ஹைட்ரஜன் திட்டங்களுக்கான பணிகள் தொடங்கப்படுவதாக பிரதமர் அறிவித்தார். லடாக்கில் அமைக்கப்படும் ஆலை, நாட்டில் உள்ள வாகனங்களுக்கு பசுமை ஹைட்ரஜனை உற்பத்தி செய்யும். பசுமை ஹைட்ரஜன் அடிப்படையிலான போக்குவரத்தை வணிக ரீதியாகப் பயன்படுத்துவதை சாத்தியமாக்கும் நாட்டின் முதல் திட்டமாக இது இருக்கும். எரிபொருள் மின்கலங்களைக் கொண்ட மின்சார வாகனங்கள் இயங்கத் தொடங்கும் நாட்டின் முதல் இடமாக லடாக் விரைவில் இருக்கும். இது லடாக்கை கார்பன் அற்ற பிராந்தியமாக மாற்ற உதவும் என்று பிரதமர் மோடி கூறினார்.
பெட்ரோல் மற்றும் விமான எரிபொருளில் எத்தனால் கலப்புக்குப் பிறகு, தற்போது இயற்கை எரிவாயு குழாய்களில் பசுமை ஹைட்ரஜனை கலப்பதை நோக்கி நாடு நகர்ந்து வருவதாகவும் பிரதமர் தெரிவித்தார். இது இயற்கை எரிவாயு மீதான இறக்குமதி சார்பைக் குறைக்கும் என்று அவர் கூறினார்.
கடந்த 8 ஆண்டுகளில், நாட்டில் 1,70,000 மெகாவாட் மின் உற்பத்தி நிறுவு திறன் சேர்க்கப்பட்டுள்ளதாக பிரதமர் தெரிவித்தார். ஒரே நாடு ஒரே மின் உற்பத்தித் திட்டம் இன்று நாட்டின் பலமாக மாறியுள்ளது. முழு நாட்டையும் இணைக்கும் வகையில் சுமார் 1,70,000 சுற்று கிலோமீட்டர் டிரான்ஸ்மிஷன் லைன்கள் போடப்பட்டுள்ளன. மேலும், சௌபாக்யா திட்டத்தின் கீழ் 3 கோடி இணைப்புகளை வழங்குவதன் மூலம், செறிவூட்டல் இலக்கை நெருங்கி உள்ளோம் என்றும் அவர் கூறினார். சுதந்திரம் அடைந்து 75 ஆண்டுகள் நிறைவடைவதற்குள் 175 ஜிகாவாட் புதுப்பிக்கத்தக்க எரிசக்தி திறனை உருவாக்க முடிவு செய்துள்ளோம் என்று பிரதமர் கூறினார். இன்று நாம் இந்த இலக்கை நெருங்கிவிட்டோம். இதுவரை, புதைபடிவமற்ற மூலங்களிலிருந்து சுமார் 170 ஜிகாவாட் திறன் நிறுவப்பட்டுள்ளது. இன்று, நிறுவப்பட்ட சூரிய சக்தியின் அடிப்படையில் உலகின் முதல் 4-5 நாடுகளில் இந்தியா உள்ளது என்றும் அவர் கூறினார்.
நாட்டில் மின் நுகர்வு மற்றும் கட்டணங்களைக் குறைப்பதிலும் உஜாலா திட்டம் பெரும் பங்காற்றியுள்ளது என்று பிரதமர் கூறினார். ஏழை மற்றும் நடுத்தர குடும்பங்களின் மின்கட்டணத்தில் ஆண்டுக்கு ரூ.50 ஆயிரம் கோடி சேமிக்கப்படுவதாகவும் தெரிவித்தார்.
காலப்போக்கில், நமது அரசியலில் கடுமையான சீர்குலைவு ஏற்பட்டுள்ளதாக பிரதமர் குறிப்பிட்டார். அரசியலில், மக்களுக்கு தைரியம் வேண்டும், உண்மையைச் சொல்ல வேண்டும், ஆனால் சில மாநிலங்கள் அதைத் தவிர்க்க முயற்சிப்பதைப் பார்க்கிறோம். இந்த உத்தி குறுகிய காலத்தில் நல்ல அரசியலாகத் தோன்றலாம். ஆனால், இன்றைய உண்மையை, இன்றைய சவால்களை, நாளை, நம் குழந்தைகளுக்காக, நம் வருங்கால சந்ததிக்காக தள்ளிப்போடுவது போன்றது. இன்றைய பிரச்சினைகளுக்கான தீர்வுகளைத் தவிர்த்து எதிர்காலத்திற்காக அவற்றை விட்டுச் செல்லும் இந்தச் சிந்தனை நாட்டுக்கு நல்லதல்ல என்றார். இந்தச் சிந்தனை செயல்முறை பல மாநிலங்களில் மின்துறையை பெரும் பிரச்சனைகளுக்குள் தள்ளியுள்ளது என்றும் பிரதமர் மோடி குறிப்பிட்டார்.