டெல்லியில் இன்று செய்தியாளர்களிடம் பேசிய
காங்கிரஸ்
எம்.பி ராகுல் காந்தி, எங்களுக்கு எதிராக நேஷனல் ஹெரால்டு விவகாரம் விஸ்வரூபம் ஆக்கப்பட்டு வருகிறது. ஒரு சிறிய அழுத்தம் கொடுத்து விட்டு, எங்களை அமைதியாக்கி விடலாம் என்று மோடியும், அமித் ஷாவும் கனவு காண்கிறார்கள். அது முற்றிலும் நடக்காது. ஜனநாயகத்திற்கு எதிராக என்ன செய்தாலும், நாங்கள் எங்களுடைய நிலைப்பாட்டில் உறுதியாக நிற்போம் என்று கூறினார்.
இதையடுத்து பாஜகவின் அச்சுறுத்தலால் ஓடி ஒளிவதற்கு இடமே இல்லை என்று நிலைக்கு வந்திருப்பதாக நினைக்கிறீர்களா? எனக் கேள்வி எழுப்பப்பட்டது. அதற்கு, ஓடி ஒளிவதை பற்றி யார் பேசுவது? அவர்கள் தான் ஓடி ஒளிவதை பற்றி பேச வேண்டும். நாங்கள் எதற்கும் பயப்பட மாட்டோம். மோடியை பார்த்து சிறிதும் பயமில்லை. நீங்கள் என்ன செய்ய வேண்டுமோ, அதை செய்யலாம். எங்களுக்கு கவலையில்லை.
ஜனநாயகத்தை காக்க, நாட்டின் இறையாண்மையை நிலைநாட்ட எனது வேலையை நான் செய்து கொண்டிருக்கிறேன் எனத் தெரிவித்தார். முன்னதாக நேஷனல் ஹெரால்டு நிதி முறைகேடு தொடர்பான வழக்கில் காங்கிரஸ் தலைவர் சோனியா காந்தி மற்றும் ராகுல் காந்தி ஆகியோர் தொடர்ச்சியாக அமலாக்கத்துறையின் விசாரணைக்கு உட்படுத்தப்பட்டனர். குறிப்பாக ஜூன் மாதத்தில் 5 நாட்களில் 50 மணி நேரம் ராகுல் காந்தியிடம் விசாரணை நடைபெற்றது.
நேஷனல் ஹெரால்டு வழக்கு பின்னணி:-
நாட்டின் முதல் பிரதமரான ஜவஹர்லால் நேருவால் 1938ல் தொடங்கப்பட்டது நேஷனல் ஹெரால்டு (National Herald) பத்திரிகை. இது அசோசியேட்டட் ஜர்னல்ஸ் லிமிடெட் என்ற நிறுவனத்தின் சார்பில் வெளியிடப்பட்டு வந்தது. பொருளாதார நெருக்கடி காரணமாக 2008ஆம் ஆண்டு பத்திரிகை நிறுத்தப்பட்டது. 2016ல் இணைய பதிப்பாக மீண்டும் தொடங்கப்பட்டது.
இதற்கிடையில் 2012ஆம் ஆண்டு ராகுல் காந்தி மற்றும் சோனியா காந்திக்கு எதிராக பாஜகவின் சுப்பிரமணிய சுவாமி வழக்கு ஒன்றை தொடர்ந்தார். அதாவது, அசோசியேட்டட் ஜர்னல்ஸ் லிமிடெட் (AGL) நிறுவனத்தை பயன்படுத்தி இருவரும் 2 ஆயிரம் கோடி ரூபாய்க்கும் அதிகமான சொத்துகளை அடையும் நோக்கில் செயல்பட்டுள்ளனர். 2008ல் பொருளாதார நெருக்கடி ஏற்பட்ட போது, காங்கிரஸ் கட்சியிடம் இருந்து 90 கோடி ரூபாய் கடனாக அசோசியேட்டட் ஜர்னல்ஸ் நிறுவனம் பெற்றிருந்தது.
இந்த கடன் தொகையை யங் இந்தியா (Young India) நிறுவனத்திற்கு வழங்க காங்கிரஸ் திருப்பி விட்டது. அதில் சோனியா காந்தி, ராகுல் காந்தி இருவரும் அங்கத்தினர். இருவரும் 38 சதவீத பங்குகளை கொண்டிருந்தனர். எனவே நேஷனல் ஹெரால்டுக்கு சொந்தமான சொத்துகளை கைப்பற்றும் நோக்கில் தான் இவ்வாறு செயல்பட்டதாக குற்றம்சாட்டினார். இந்த வழக்கு தான் தற்போது காங்கிரஸ் தலைவர்களுக்கு எதிராக விஸ்வரூபம் எடுத்து நிற்கிறது.