“முரசொலி நான் பெற்ற முதல் குழந்தை! ஆம் அந்த முதற் பிள்ளைதான் தலையாலங்கானத்துச் செருவென்ற பாண்டியனைப்போல கிண்கிணி அணிந்த கால்களுடன் பகைவர்கள் பலரைக் களத்தில் சந்திக்க சென்று வா மகனே! செருமுனை நோக்கி! என அனுப்பி வைக்கப்பட்ட அன்புப் பிள்ளை.” – முரசொலி பற்றி இப்படி கலைஞர் கருணாநிதி சொல்வார்.
ஆம்,! திராவிடர் இயக்கத்தின் போர்வாளாக திகழ்ந்து வருகிற முரசொலிக்கு கலைஞரின் அத்தனை போர்க்குணங்களும் உண்டு. ஏனெனில் கலைஞரின் மற்றொரு வடிவமே முரசொலி. கலைஞர் கருணாநிதியின் 18ஆவது வயதில் 1942ஆம் ஆண்டு ஆகஸ்ட் 10ஆம் தேதி முதன் முதலில் முரசொலி வெளியானது. இரண்டாம் உலகப் போர் நடைபெற்ற சமயம் என்பதால், கிடைத்த தாள்களில் துண்டறிக்கையாக முரசொலி அப்போது வெளியானது.
முரசொலி துண்டறிக்கை வெளியிடப்பட்ட நாள்களில் கலைஞர் கருணாநிதியின் பள்ளி இறுதி தேர்வு முடிவுறாமல் இருந்தது. அதனால் அவரது இயற்பெயரை அத்துண்டறிக்கையில் போட்டுக் கொள்ளாமல் சேரன் என்ற புனை பெயரில் கலைஞர் கருணாநிதி மறைந்திருந்தார். அதன்பின்னர் 1948ஆம் ஆண்டு முதல், முரசொலியின் வடிவம் துண்டறிக்கை என்ற நிலையில் இருந்து வார இதழானது. இளைஞர்களிடையே திராவிடர் இயக்க உணர்ச்சியை ஊட்டும் போர்க் குணமிக்க வீச்சாக முரசொலி திகழ்ந்தது.
கலைஞர் தனது எழுத்துகளின் அத்தனை வடிவங்களையும் முரசொலிக்காக பயன்படுத்தினார். குறளோவியத்தை முதன் முதலில் கலைஞர் முரசொலியில்தான் எழுதினார். கலைஞர் தாமாகவே கற்றறிந்து எழுதப் பழகிக் கொண்டவர். அதற்காக மாணவ நேசனும் (பள்ளி நாள்களில் கலைஞரே வெளியிட்ட கையெழுத்துப் பிரதி ஏடு) முரசொலி துண்டறிக்கைகளும் அவருக்கு நல்ல பயிற்சியை அளித்திருந்தன. இராஜாஜி முதலமைச்சர் பதவியிலிருந்து விலகி “கல்கி”யில் சக்கரவர்த்தி திருமகன் எனும் பெயரில் இராமாயணத் தொடரை எழுதி வந்தார். இத்தொடரை விமர்சனம் செய்து கலைஞர் முரசொலியில் எழுதினார். அக்கட்டுரைத் தொடருக்கு ‘சக்கரவர்த்தியின் திருமகன்’ எனும் தலைப்பைச் சூட்டி தமது பெயரை ‘மூக்காஜி’ என வைத்துக் கொண்டார்.
தொடக்க காலத்திலேயே கலைஞரது எழுத்துகள் பெரியார், அறிஞர் அண்ணா, புரட்சிக் கவிஞர் பாரதிதாசன் ஆகியோரின் மதிப்பைப் பெற்றன. 1938இல் எழுதத் தொடங்கிய கலைஞர் கருணாநிதி, உடல்நலம் குன்றி பேணா பிடிக்க இயலாது போன போதுதான் தனது எழுத்தை நிறுத்தினார். தமிழ் இல்க்கியம், அரசியல், இதழியல் துறை மீதான ஆர்வத்தை இளைஞர்களிடம் ஏற்படுத்தியதில் பத்திரிகையாளராக கலைஞர் கருணாநிதிக்கு முக்கிய பங்குண்டு.
கலைஞர் கருணாநிதியை போலவே, முரசொலியும் பல சோதனை, வேதனைகளைக் கடந்து வந்திருக்கிறது. நெருக்கடி காலத்தில், முரசொலி சந்தித்த பிரச்சினைகள் ஏராளம். முரசொலியில் கலைஞர் எழுதுவதற்கு தணிக்கை முறை திணிக்கப்பட்டது. அதனைக்கண்டு மகிழ்ந்த சில எரிச்சல் ஏடுகள், “கருணாநிதியின் ஆட்டம் நீண்ட நாள் நீடிக்காது; முரசொலி, விரைவிலேயே அடங்கும்; அல்லது அடக்கப்படும்” என்றெல்லாம் எழுதின.
ஆனால், “முரசொலி, நான் பெற்ற குழந்தை! அது என் கண்ணெதிரே வீர மரணம் அடையுமேயானால் நான் புறநானூற்றுத் தாய் போல மகிழ்ச்சி அடைவேனே அல்லாமல் ஆற்றாது அழுது புலம்பிட மாட்டேன். மாற்றார் ஏடுகள் எழுதியுள்ளது போல முரசொலி அடக்கப்படும் நாள் எனக்குத் திருநாள்; ஆம் – தியாகத் திருநாள்!” என்று முரசொலியிலேயே கலைஞர் எழுதினார்.
நெருக்கடி நிலையின் போது பத்திரிகைக் தணிக்கை நடைமுறையில் இருந்தது. இதனை எதிர்த்து நீதி மன்றத்தில் வழக்குத் தொடுத்தது முரசொலி! அந்த நேரத்தில் செய்திகளை வெளியிட முடியாத சூழ்நிலையை ‘வெண்டைக்காய் வழவழப்பாய் இருக்கும்’, ‘விளக்கெண்ணெய் சூட்டைத் தணிக்கும்’ என்ற தலைப்பை பெரிதாகப் போட்டு முரசொலி அக்கால நிலையை மக்களுக்கு உணர்த்திக் காட்டியது.
இதே கால கட்டத்தில வெளியிடப்பட்டு வந்த கலைஞரின் இலக்கியக் கடிதங்கள், கரிகாலன் பதில்கள், அண்ணா சமாதிக்கு வர இயலாதோர் பட்டியல் (மிசாவில் கைது செய்யப்பட்டு சிறையில் அடைக்கப்பட்டவர்களை முரசொலி அவ்வாறு நெருக்கடி நிலையின்போது அடையாளம் காட்டியது) போன்ற பகுதிகள் மெய்சிலிர்க்க வைப்பது.
எம்ஜிஆர் மறைவின் போது, ‘செல்வாக்குள்ள முதல்வர்’ என கலைஞர் எழுதியதை முரசொலி வெளியிட்டது. எம்ஜிஆர் மரணமுற்ற அன்று அண்ணா சாலையில் உள்ள கலைஞரது சிலை தாக்கப்பட்டது. இளைஞர் ஒருவர் கடப்பாரைக் கொண்டு கலைஞரின் சிலையைத் தாக்குகின்ற காட்சியை ‘இந்தியன் எக்ஸ்பிரஸ்’ நாளிதழ் படமெடுத்து வெளியிட்டது. அதே படத்தை முரசொலி, கலைஞரின் கவிதையோடு வெளியிட்டது. அதில் கலைஞர் இப்படி சொல்கிறார், “உடன்பிறப்பே,! செயல்பட விட்டோர் சிரித்து மகிழ்ந்து நின்றாலும் அந்த சின்னத் தம்பி என் முதுகிலே குத்தவில்லை – நெஞ்சிலே தான் குத்துகின்றான். அதனால் நிம்மதி எனக்கு! வாழ்க! வாழ்க!”
எதிர்க்கட்சியாக இருந்தபோது, முரசொலியில் கலைஞர் வெளியிடும் அறிக்கைகளுக்கு ஆளுங்கட்சி மிகுந்த முக்கியத்துவம் கொடுப்பது வழக்கமாக இருந்தது. கட்சியில் பல தொய்வுகள் ஏற்பட்டபோதும், தொண்டர்களை சிதறாமல் பார்த்துக் கொண்டதில் முரசொலியில் வந்த கலைஞரது எழுத்துக்கள் முக்கிய காரணம். கலைஞர் கருணாநிதியின் நான்காம் ஆண்டு நினைவு தினம் கடந்த 7ஆம் தேதி அணுசரிக்கப்பட்டது. கலைஞர் இன்று இல்லையென்றாலும், அவரது எழுத்துக்கள் இன்னும் உயிர்ப்போடு இருக்கின்றன. அந்த எழுத்துக்களுக்கு செயல்வடிவம் கொடுத்த அவர் பெற்ற முதல் குழந்தை முரசொலி, 80 ஆண்டுகளை கடந்து வீறுநடை போட்டுக் கொண்டிருக்கிறது.