ராஷ்ட்ரீய ஜனதா தளத்துடன் ஐக்கிய ஜனதா தளம் கட்சித் தலைவர் நிதிஷ் குமார் கூட்டணி வைத்துள்ளது குறித்து, தேர்தல் திட்ட வகுப்பாளர் பிரசாந்த் கிஷோர் கருத்துத் தெரிவித்து உள்ளார்.
2017 ஆம் ஆண்டு பாஜக தலைமையிலான தேசிய ஜனநாயகக் கூட்டணியில் இணைந்த ஐக்கிய ஜனதா தளம் கட்சித் தலைவரும், பீகார் மாநில முதலமைச்சருமான நிதிஷ் குமார், பாஜகவுடன் ஏற்பட்ட கருத்து வேறுபாடுகள் காரணமாக, கூட்டணியில் இருந்து விலகுவதாக, நேற்று அறிவித்தார். இதை அடுத்து, பழைய கூட்டணி கட்சியான, லாலு பிரசாத் யாதவ் மகன் தேஜஸ்வி யாதவ் தலைமையிலான ராஷ்ட்ரீய ஜனதா தளம் கட்சி ஆதரவுடன் பீகார் மாநிலத்தில் நிதிஷ் குமார் மீண்டும் ஆட்சி அமைத்துள்ளார்.
இந்நிலையில், பீகார் மாநில அரசியல் சூழல்கள் குறித்து, தேர்தல் திட்ட வகுப்பாளரும், பீகார் மாநில முதலமைச்சர் நிதிஷ் குமாரின் நெருங்கிய நண்பருமான பிரசாந்த் கிஷோர் கூறியதாவது:
பீகார் மாநிலத்தில் அரசியல் ஸ்திரத்தன்மை திரும்பும் என நம்புகிறேன். புதிய அத்தியாயத்தை துவங்க உள்ளதாக நிதிஷ் குமார் தெரிவித்து உள்ளார். பீகார் மக்களின் விருப்பங்களை அவர் நிறைவேற்றுவார் என நம்புகிறேன். 2013 – 14 முதல், பீகார் மாநிலத்தில் 6வது முறையாக ஆட்சி அமைக்கும் முயற்சி நடந்துள்ளது. கடந்த 10 ஆண்டுகளாக இந்த அரசியல் ஸ்திரமற்ற சூழல் தொடர்கிறது.
ராஷ்ட்ரீய ஜனதா தளம் கட்சியுடனான இந்த கூட்டணி நீடிக்கும் எனவும், மக்களின் எண்ணங்களுடன் ஒத்து இருக்க வேண்டும் எனவும் மக்கள் எதிர்பார்க்கின்றனர். புதிய அரசு முந்தைய அரசை விட சிறப்பாக செயல்படுமா இல்லையா என்பதை பொறுத்திருந்து தான் பார்க்க வேண்டும்.
தேஜஸ்வி யாதவ் பீகாரில் தனிப்பெரும் கட்சியின் தலைவராக உள்ளார். இந்த புதிய அரசாங்கத்தில் அவர் எவ்வாறு செயல்படுகிறார் என்பதை மக்கள் பார்க்க உள்ளனர். தேசிய அளவில் பாஜகவுக்கு மாற்று எதிர்க்கட்சியை உருவாக்க வேண்டும் என்ற எண்ணத்தில் இக்கூட்டணி அமைந்ததாக நான் நினைக்கவில்லை.
பிரதமர் பதவிக்கு பொருத்தமானவர் என்று ஒருபோதும் நிதிஷ்கு மார் கூறியதாக நான் கேள்விப்படவில்லை. எதிர்க்கட்சிகள் ஒன்று சேர்ந்து, இதுதான் வழி, இப்படித்தான் செல்ல வேண்டும் என்று கூறியதாகவும் நான் கேட்கவில்லை. யார் பிரதமர் என்பதை மக்கள் தீர்மானிக்கட்டும். நிதிஷ் குமார் வேட்பாளராக இருந்தால் கூட அனைத்துக் கட்சிகளும் ஏற்க வேண்டும்.
இவ்வாறு அவர் கூறினார்.