முகப்பு படத்தை மாற்றிய ஆர்.எஸ்.எஸ்.: தேசியக் கொடியுடன் என்ன சர்ச்சை?

நாட்டின் 75ஆவது சுதந்திர தினத்தை வருகிற 15 ஆம் தேதி கொண்டாடப்படவுள்ளது. வரலாற்று சிறப்புமிக்க இந்த தினத்தை கொண்டாட நாடு முழுவதும் ஏற்பாடுகள் நடந்து வருகின்றன. நாட்டின் 75-வது சுதந்திர தினம் “ஆசாதி கா அம்ரித் மஹோத்சவ் – சுதந்திர திருநாள் அமுதப் பெருவிழா” என்ற பெயரில் கொண்டாடப்பட்டு வருகிறது. சுதந்திர தினத்தை முன்னிட்டு, மத்திய பாஜக தலைமையிலான அரசு ஹர் கர் திரங்கா என்ற பரப்புரையை முன்னெடுத்துள்ளது. அதன் ஒருபகுதியாக, அனைத்து வீடுகளிலும் தேசியக் கொடி ஏற்ற வேண்டும் என மத்திய அரசு கேட்டுக் கொண்டது. மேலும் சமூக வலைதளங்களிலும் மூவர்ணக் கொடியை முகப்பு புகைப்படமாக மாற்ற வேண்டும் எனவும் மத்திய அரசு கேட்டுக் கொண்டது.

இதையடுத்து, ஃபேஸ்புக், வாட்ஸ் அப், ட்விட்டர் உள்ளிட்ட அனைத்து சமூக வலைதளங்களிலும் பலரும் தேசியக் கொடியை முகப்பு படமாக வைத்து வருகின்றனர். காங்கிரஸ் தலைவர்கள் நேரு பிடித்திருக்கும் தேசியக் கொடியை முகப்பு படமாக வைத்து வருகின்றனர். ஆனால், ஆர்.எஸ்.எஸ்., அமைப்பு, அதன் தலைவர் மோகன் பாகவத் உள்ளிட்டவர்கள் புகைப்படத்தை மாற்றாமல் இருந்தனர். இதற்கு கடுமையான விமர்சனங்கள் எழுந்தன. பிரதமர் மோடியின் சொல்லை ஆர்.எஸ்.எஸ்., இயக்கத்தினர் மதிக்க மாட்டார்களா? பிறருக்கு தேசபக்தி பற்றி பாடம் எடுக்கும் ஆர்.எஸ்.எஸ்.ஸும் பாஜகவும் இதுபோன்றுதான் செயல்படுமா எனவும் காட்டமாக விமர்சிக்கப்பட்டது.

காங்கிரஸ் தலைவர் ராகுல் காந்தி ஆகஸ்ட் மாதம் 3ஆம் தேதி ஆர்.எஸ்.எஸ்., தலைமை அலுவலகத்தில் கடந்த 52 ஆண்டுகளாக ஏன் தேசிய கொடியை ஏற்றவில்லை எனக் கேள்வியெழுப்பியிருந்தார். ‘ஆர்எஸ்எஸ் சுதந்திர இந்தியாவையும், தேசிய கொடியையும் நிராகரித்துவிட்டது’ என ஏஐஎம்ஐஎம் கட்சியின் நிறுவனத் தலைவர் அசாதுதீன் ஓவைசி விமர்சித்தார். அதேபோல், “நாங்கள் எங்கள் தலைவர் நேரு பிடித்த தேசியக் கொடியை முகப்பாக வைத்துள்ளோம். பிரதமரின் செய்தி அவர்களின் குடும்பத்தினருக்கு கூட சென்று சேரவில்லை என நினைக்கிறேன். ஆர்எஸ்எஸ் தலைவர்கள் பிரதமரின் பேச்சுக்கு கீழ்படிவார்களா?” என்று காங்கிரஸ் மூத்த தலைவர் ஜெய்ராம் ரமேஷ் கேள்வி எழுப்பினார்.

இதற்கு பதில் அளித்த ஆர்.எஸ்.எஸ்., தலைவர்கள், “ஆர்.எஸ்.எஸ்.,இன் ஒவ்வொரு இழைகளிலும் தேசப்பக்தி நிறைந்துள்ளது. ஆசாதி கா அம்ரித் மஹோத்சவ் பிரச்சாரத்திற்கு தனது ஆதரவை அறிவித்துள்ளது. சுதந்திரதினத்தையொட்டிய மத்திய, மாநில அரசாங்கங்கள் மற்றும் பிற அமைப்புகளுக்கு ஆதரவளிக்க அனைத்து சேவகர்களுக்கும் வேண்டுகோள் விடுக்கப்பட்டுள்ளது. சுதந்திர தின கொண்டாட்டங்களை அரசியலாக்க கூடாது” எனக் கேட்டுக் கொண்டனர்.

இந்த நிலையில், ஆர்.எஸ்.எஸ். ட்விட்டர் பக்கத்தின் முகப்பு படமாக மூவர்ண கொடி வைக்கப்பட்டுள்ளது. அதன் தலைவர் மோகன் பாகவத்தும் தனது முகப்பு படத்தை தேசியக் கொடியாக மாற்றியுள்ளார். ‘யாருடைய அழுத்தத்திற்காகவும் நாங்கள் எந்த முடிவையும் எடுப்பதில்லை. எங்கள் அதிகாரப்பூர்வ ட்விட்டர் படத்தை மாற்ற வேண்டும் என்றால், அது சரியான நேரத்தில் மாற்றப்படும்’ என ஆர்.எஸ்.எஸ். மூத்த தலைவர் ஒருவர் கடந்த வாரம் தெரிவித்திருந்த நிலையில், இன்று ஆர்.எஸ்.எஸ்.இன் சமூக வலைதளப் புகைப்படங்கள் மாற்றப்பட்டுள்ளன.

ஆர்.எஸ்.எஸ்., தேசியக்கொடி சர்ச்சை

ஆண்டுதோறும் சுதந்திர தினம் மற்றும் குடியரசு தினம் வரும்போது கூடவே ஒரு சர்ச்சையும் வரும். தேசபக்த இயக்கம் என்று சொல்லக்கூடிய ஆர்.எஸ்.எஸ்., அமைப்பு, சுதந்திர தினத்தன்றும், குடியரசு தினத்தன்றும் தங்களுடைய இடத்தில் தேசியக்கொடியை ஏற்றுகிறதா இல்லையா என்பதுதான் அந்த சர்ச்சை. மேலும், தேசியக் கொடியை ஆர்.எஸ்.எஸ்., அமைப்பினர் ஏற்றுக் கொள்வதில்லை என்ற விமர்சனங்களும் முன்வைக்கப்படும்.

1948 ஆண்டில், நாதுராம் கோட்சேயால், மகாத்மா காந்தி சுட்டுக் கொல்லப்பட்ட பின், ஆர்.எஸ்.எஸ்., அமைப்புக்கு தடை விதிக்கப்பட்டது. அதேநேரத்தில், நாடு சுதந்திரம் பெற்றது முதல் மூவர்ணக் கொடியை தேசியக் கொடியாக ஏற்க மறுத்து வரும் ஆர்.எஸ்.எஸ்., அமைப்பு, ‘பகவா’ என அழைக்கப்படும் காவி நிற கொடியையே தேசியக் கொடியாக கருதி வருகிறது. பல்வேறு சமயங்களில் ஆர்.எஸ்.எஸ். தலைவர்களும் இதானை எதிரொலித்துள்ளனர்.

பிரதமராக ஜவகர்லால் நேரு இருந்த போது, அவரது அமைச்சரவையில் உள்துறை அமைச்சராக இருந்த சர்தார் வல்லபாய் படேல், ஆர்.எஸ்.எஸ்., தலைவர்களுடன் பேச்சுவார்த்தை நடத்திய போது, ஆர்.எஸ்.எஸ்., மீதான தடையை நீக்க வேண்டும் எனில் மூவர்ண கொடியை தேசியக் கொடியாக ஏற்க வேண்டும் என திட்டவட்டமாக கூறினார். ஆனாலும், அதை ஏற்க ஆர்.எஸ்.எஸ்., முன்வரவில்லை என கூறப்படுகிறது.

நாக்பூர் ஆர்எஸ்எஸ் தலைமையகத்தில் இந்திய தேசியக் கொடி ஆங்கிலேயரிடமிருந்து நாடு விடுதலை பெற்ற ஆகஸ்ட் 15, 1947 மற்றும் முதல் குடியரசுத் தினமான 26 ஜனவரி 1950 ஆம் ஆண்டில் ஏற்றப்பட்டது. இதையடுத்து, 50 ஆண்டுகளாக ஆர்எஸ்எஸ் தலைமையகத்தில் தேசியக் கொடி ஏற்றப்படவில்லை. தொடர்ந்து, 2001ஆம் ஆண்டு ஜனவரி 26ஆம் தேதியன்று, ராஷ்டிர பிரேமி யுவ தளம் அமைப்பைச் சேர்ந்த பாபா மென்தே, ரமேஷ் கலாம்பே, திலீப் சட்டானி ஆகிய மூவர் மகாராஷ்டிரா மாநிலம், நாக்பூரில் உள்ள ஆர்.எஸ்.எஸ்., தலைமையகத்தில் வலுக்கட்டாயமாக நுழைந்து தேசியக் கொடியை ஏற்றினர். அவர்கள் மீது ஆர்.எஸ்.எஸ்., அமைப்பால் வழக்கு தொடரப்பட்டு 11 ஆண்டுகளுக்குப் பின் அவர்கள் விடுதலை செய்யப்பட்டனர்.

அதன்பிறகு, 2002ஆம் ஆண்டு ஜனவரி 26ஆம் தேதி ஆர்.எஸ்.எஸ்., அலுவலகத்தில் தேசியக் கொடி ஏற்றப்பட்டது. இதையடுத்து, ஒவ்வொரு ஆண்டும், குடியரசு தினம் மற்றும் சுதந்திர தினத்தன்று மட்டுமே ஆர்.எஸ்.எஸ்., அலுவலகங்களில் தேசியக் கொடி ஏற்றப்படுகிறது. இதுகுறித்து கேட்டால் உடனடியாக ஒரு பதிலை ஆர்.எஸ்.எஸ்., அமைப்பினர் கூறுவர். அதாவது, ‘2002ஆம் ஆண்டு வரை தனியார் நிறுவனங்களில் தேசியக் கொடி ஏற்ற அனுமதியில்லை. ஆகையால், நாங்களும் தேசியக் கொடி ஏற்றவில்லை. வாஜ்பாய் ஆட்சிகாலத்த்ல் 2002ஆம் ஆண்டு தேசியக் கொடி சட்டத்தில் மாற்றம் கொண்டு வந்ததில் இருந்து, அதில் குறிப்பிட்டுள்ளபடி சட்டத்துக்கு உட்பட்டு நாங்கள் ஏற்றுகிறோம்.” என்பர்.

தேசியக் கொடி குறியீடு 2002

தேசியக் கொடியை யார் பறக்கவிடலாம், எப்போது தேசியக் கொடியை பறக்கவிடலாம் என்பது விவாதத்திற்குரியது. காங்கிரஸ் எம்.பி.,யும் தொழிலதிபருமான நவீன் ஜிண்டால் 1995 ஆம் ஆண்டு பிப்ரவரி மாதம் டெல்லி உயர் நீதிமன்றத்தில் தேசியக் கொடியை பறக்கவிடுவது தொடர்பாக அதிகாரிகளால் விதிக்கப்பட்ட தடையை எதிர்த்து ரிட் மனு தாக்கல் செய்தார். அவரது தொழிற்சாலை ஒன்றில் தேசியக் கொடி பறக்கவிடப்பட்டதற்காக அவர் மீது அப்போது நடவடிக்கை பாய்ந்திருந்தது.

அதுவரை, ஜனவரி 26, ஆகஸ்ட் 15 மற்றும் அக்டோபர் 2 போன்ற சிறப்பு நிகழ்வுகளைத் தவிர தனியாரோ, குடிமக்களோ தேசியக் கொடியை பறக்கவிட அனுமதிக்கப்படவில்லை. இதுகுறித்து ஆராய அமைக்கப்பட்ட டாக்டர் பி.டி.ஷினாய் கமிட்டி அறிக்கையை ஜனவரி 15, 2002 அன்று மத்திய அமைச்சரவை ஏற்றுக்கொண்டது. அதன்படி, 26 ஜனவரி 2002 முதல் அனைத்து நாட்களிலும் தேசியக் கொடியை யார் வேண்டுமானாலும் அதற்கான சட்டத்துக்கு உட்பட்டு பறக்கவிடலாம் என அனுமதி அளிக்கப்பட்டது.

2002க்கு முன்பு தேசியக் கொடி குறியீடு

2002ஆம் ஆண்டுக்கு முன்னர், அனைத்து குடிமக்களும் மேற்கண்ட மூன்று தினங்களில் எந்த தடையும் இல்லாமல் தேசியக் கொடியை பறக்க அனுமதிக்கப்பட்டே வந்தனர். இவை சில ஆவணங்களிலும் பதிவு செய்யப்பட்டுள்ளது. இது தொடர்பாக பஞ்சாப் அரசாங்க இணையதளத்தில் எடுக்கப்பட்ட 1982 நெறிமுறை கையேட்டில் 2002க்கு முன் நடைமுறையில் இருந்த கொடிக் குறியீடு மற்றும் 15-06-1971 தேதியிட்ட உள்துறை அமைச்சரின் கடிதம் ஆகிய இரண்டு ஆவணங்களை எடுத்துக் கொண்டால், மேற்கண்ட மூன்று தினங்களில் எந்த தடையும் இல்லாமல் தேசியக் கொடியை பறக்கவிட அனைவருக்கும் அனுமதி அளிக்கப்பட்டு வந்ததை தெரிந்து கொள்ள முடியும்.

தேசிய கொடி குறியீடு ஆவணங்கள்
தேசிய கொடி குறியீடு ஆவணங்கள்

இந்த இரண்டு ஆவணங்களும் 2002 ஆம் ஆண்டுக்கு முன்னர் நடைமுறையில் இருந்த கொடிக் குறியீட்டை சுட்டிக்காட்டுகிறது. அதன்படி, வருடத்தில் குறைந்தது மூன்று நாட்கள், அதாவது; ஜனவரி 26, ஆகஸ்ட் 15 மற்றும் அக்டோபர் 2 ஆகிய தேதிகளில் தேசியக் கொடியை ஏற்றுவதற்கு அனுமதி அளிக்கப்பட்டுள்ளது. இந்த மூன்று நாட்களில் தேசியக் கொடியை ஏற்றுவதற்கு யாருக்கும் எவ்வித தடையும் விதிக்கப்படவில்லை. ஆனாலும், ஆர்.எஸ்.எஸ்., அமைப்பினர், அந்த சமயத்திலும் கூட தேசியக் கொடி ஏற்றாமல், கிட்டத்தட்ட 52 ஆண்டுகளாக இருந்தது என்பது ஆர்.எஸ்.எஸ்., ஆதரவாளர்களுக்கு சங்கடமான உண்மை. எனவே ஆர்.எஸ்.எஸ்., தேசியக் கொடியை ஏற்றுவதைக் கொடிக் குறியீடுதான் தடுத்தது என்று கூறி நியாயப்படுத்த முயற்ச்சிப்பது உண்மை அல்ல.