ஆரோவில் அறக்கட்டளை பிறப்பித்த உத்தரவு ரத்து – ஐகோர்ட் அதிரடி!

ஆரோவில் நகர் மேம்பாட்டு கவுன்சிலை மாற்றி அமைத்து ஆரோவில் அறக்கட்டளை பிறப்பித்த உத்தரவை ரத்து செய்து சென்னை உயர் நீதிமன்றம் உத்தரவிட்டு உள்ளது.

விழுப்புரம் மாவட்டத்தில் ஒற்றுமை, அமைதியை வலியுறுத்தி அரவிந்தர் மற்றும் அன்னையால் ஆரம்பிக்கப்பட்டது ஆரோவில் அறக்கட்டளை. அதன் நிர்வாகத்தை கவனிக்க நிர்வாகக் குழு, குடியிருப்புவாசிகள் சபை, குடியிருப்புவாசிகள் சபையின் செயற்குழு, சர்வதேச ஆலோசனைக் கவுன்சில் ஆகிய நான்கு அமைப்புகள் உள்ளன.

இதில் ஆரோவில் நகர் மேம்பாட்டு கவுன்சில், குடியிருப்புவாசிகள் சபை ஆகியவற்றின் உறுப்பினர்களை நீக்கி விட்டு, புதிய உறுப்பினர்களை நியமித்து மாற்றி அமைத்து அறக்கட்டளை உத்தரவுகளை பிறப்பித்திருந்தது.

இந்த உத்தரவுகளை எதிர்த்து தாக்கல் செய்த வழக்குகளை விசாரித்த நீதிபதி அப்துல் குத்தூஸ், நான்கு அமைப்புகளையும் மாற்றி அமைத்து அறக்கட்டளை செயலாளர் பிறப்பித்த உத்தரவு, சட்டத்துக்கு விரோதமாக உள்ளதாகக் கூறி, அந்த உத்தரவுகளை ரத்து செய்து உத்தரவிட்டார்.

மேலும், 2005 ஆம் ஆண்டுக்கு பின் ஆரோவில் குடியிருப்புவாசிகள் சபையில் பதிவுகள் புதுப்பிக்கப்படாததால், விரிவான விளம்பரங்களை வெளியிட்டு, பதிவுகளை புதுப்பிக்கும்படி ஆரோவில் அறக்கட்டளை செயலாளருக்கு உத்தரவிட்ட நீதிபதி, ஒன்றுபட்டால் உண்டு வாழ்வு என்ற தாரக மந்திரத்தை பின்பற்றி, அரவிந்தர் மற்றும் அன்னையின் நோக்கத்தை நிறைவேற்ற வேண்டும் என, வழக்கில் சம்பந்தப்பட்ட தரப்பினருக்கு அறிவுரை கூறினார்.