அதிமுகவில் வி.கே.சசிகலா, டிடிவி தினகரன் இணைவரா என்ற கேள்விக்கு, ஓ.பன்னீர்செல்வம் ஆதரவாளர் வைத்திலிங்கம் பதில் அளித்துள்ளார்.
அஇஅதிமுக இடைக்காலப் பொதுச் செயலாளராக, கடந்த ஜூலை மாதம் 11 ஆம் தேதி, முன்னாள் முதலமைச்சரும், எதிர்க்கட்சித் தலைவருமான எடப்பாடி கே.பழனிசாமி தேர்வு செய்யப்பட்டார். ஒற்றைத் தலைமை விவகாரத்திற்கு தொடக்கத்தில் இருந்தே எதிர்ப்புத் தெரிவித்த ஓ.பன்னீர்செல்வம் மற்றும் அவரது ஆதரவாளர்களை கட்சியில் இருந்து நீக்கினார்.
இதனால் கடும் அதிருப்தி அடைந்த ஓ.பன்னீர்செல்வம், பதிலுக்கு போட்டியாக, அதிமுக ஒருங்கிணைப்பாளர் என்ற முறையில்,
மற்றும் அவரது ஆதரவாளர்களை கட்சியில் இருந்து நீக்குவதாக அறிவித்தார். மேலும், அதிமுக இடைக்காலப் பொதுச் செயலாளராக, எடப்பாடி பழனிசாமியை அங்கீகரிக்கக் கூடாது எனக் கோரி, இந்தியத் தலைமைத் தேர்தல் ஆணையம், நீதிமன்றம் ஆகியவற்றில் முறையிட்டு உள்ளார்.
அண்மையில், சென்னை உயர் நீதிமன்றத்தில் நடைபெற்ற அதிமுக பொதுக்குழு விசாரணையில், எடப்பாடி பழனிசாமி தரப்பிடம், நீதிபதி ஜெயச்சந்திரன் சரமாரியாக கேள்வி எழுப்பினார். ஜெயலலிதா தான் அதிமுக நிரந்தர பொதுச் செயலாளர் எனக் கூறி விட்டு, அதை ரத்து செய்தது ஏன் என்பது உட்பட பல்வேறு கேள்விகளை, நீதிபதி ஜெயச்சந்திரன் முன்வைத்தார். இதன் காரணமாக, தீர்ப்பு தங்களுக்கு சாதகமாக வருமோ என்ற எதிர்பார்ப்பில் ஓ.பன்னீர்செல்வம் தரப்பினர் வழிமேல் விழிவைத்து காத்து கிடக்கின்றனர்.
இதற்கிடையே, எடப்பாடி பழனிசாமிக்கு டஃப் கொடுக்க,
– டிடிவி தினகரனுடன், ஓ.பன்னீர்செல்வம் இணைய இருப்பதாக தகவல்கள் பரவி வருகின்றன. இதை மேலும் உறுதிப்படுத்தும் வகையில், அண்மையில் பேட்டி ஒன்றில் தெரிவித்த டிடிவி தினகரன், “ஓ.பன்னீர்செல்வத்துடன் மீண்டும் இணைய வாய்ப்புள்ளது; ஆனால் எடப்பாடி பழனிசாமியுடன் இணைய வாய்ப்பே இல்லை” என, ஹின்ட் கொடுத்து பேசினார்.
இந்நிலையில், ஓ.பன்னீர்செல்வத்தின் ஆதரவாளரும், முன்னாள் அமைச்சருமான ஆர்.வைத்திலிங்கம் செய்தியாளர்களிடம் கூறுகையில், “கடந்த 10 நாட்களாக எங்களுக்கு ஆதரவு பெருகிக் கொண்டே வருகிறது. 80 சதவீத தொண்டர்கள் எங்களிடம் தான் உள்ளனர். டிடிவி தினகரன், சசிகலாவை கட்சியில் இணைப்பது குறித்து கட்சித் தலைமை முடிவெடுக்கும்” என தெரிவித்து உள்ளார். இந்த விவகாரம், எடப்பாடி பழனிசாமி மற்றும் அவரது ஆதரவாளர்களிடையே அதிருப்தியை ஏற்படுத்தி உள்ளது.