அரசு ஊழியர், ஆசிரியர்களுக்கு தமிழக அரசு அறிவித்துள்ள அகவிலைப்படி உயர்வு ஏமாற்றம் அளிக்கிறது என, தமிழ்நாடு ஆரம்பப் பள்ளி ஆசிரியர் கூட்டணி அதிருப்தி தெரிவித்து உள்ளது.
76வது சுதந்திர தின விழாவை ஒட்டி, சென்னை செயின்ட் ஜார்ஜ் கோட்டையில் தேசியக் கொடி ஏற்றி உரையாற்றிய தமிழக முதலமைச்சர்
, அரசு ஊழியர்களுக்கு அகவிலைப்படி உயர்த்தி வழங்கப்படும் என்றும், 31 சதவீதத்தில் இருந்து 34 சதவீதமாக அதிகரிக்கப்படுவதாகவும் அறிவித்தார்.
இந்நிலையில், அரசு ஊழியர், ஆசிரியர்களுக்கு தமிழக அரசு அறிவித்துள்ள அகவிலைப்படி உயர்வு ஏமாற்றம் அளிக்கிறது என தமிழ்நாடு ஆரம்பப் பள்ளி ஆசிரியர் கூட்டணி அதிருப்தி தெரிவித்துள்ளது. இது குறித்து இதன் மதுரை மாவட்ட தலைவர் சீனிவாசன் கூறியதாவது:
மத்திய அரசு, விலைவாசி புள்ளியை கணக்கிட்டு ஆறு மாதங்களுக்கு ஒரு முறை வழங்க வேண்டிய அகவிலைப்படி உயர்வை பரிந்துரைத்து மத்திய அரசு ஊழியர்களுக்கு நிர்ணயிக்கிறது. அதை பின்பற்றி மாநில அரசுகள் தங்கள் ஊழியர்களுக்கு அகவிலைப்படி உயர்வை நிர்ணயிக்க வேண்டும். ஆனால் இந்த நடைமுறையை தமிழக அரசு பல ஆண்டுகளாக கடைபிடிக்கவில்லை.
மத்திய அரசு ஜனவரி மாதம் 1 முதல் மூன்று சதவீதம் உயர்வை அறிவித்தும் வழக்கம் போல் இந்தாண்டும் மாநில அரசு அது குறித்து சிந்திக்காமல் ஆறு மாதங்கள் நிறுத்தி வைத்துள்ளன. கொரோனாவின் போது மத்திய அரசு வழங்கிய போதும் மாநில அரசு 18 மாதங்கள் அகவிலைப்படி உயர்வை நிறுத்தி வைத்தன.
தமிழக அரசு கால தாமதமாக உயர்வை அறிவிப்பதும், அறிவிக்கும் போது ஆறு மாதங்கள் உயர்வை பறித்து கொள்வது என்ற தந்திரத்தை கையாள்வது வழக்கமாக உள்ளது. எனவே அகவிலைப்படி உயர்வை ஜூலை மாதம் 1 ஆம் தேதி முதல் என்பதற்கு பதில் ஜனவரி மாதம் 1 ஆம் தேதி முதல் முன்தேதியிட்டு வழங்க அரசு உத்தரவிட வேண்டும்.
இவ்வாறு அவர் கூறினார்.