ஜம்மு காஷ்மீரில் பயங்கரவாதிகள் சமீபத்தில் நடத்திய திடீர் தற்கொலை படை தாக்குதலில் 3 ராணுவ வீரர்கள் வீரமரணம் அடைந்தனர். இந்த பயங்கரவாத தாக்குதலில் உயிரிழந்தவர்களில் மதுரை மாவட்டம் திருமங்கலம், டி.புதுப்பட்டி கிராமத்தை சேர்ந்த லெட்சுமணன் என்ற ராணுவ வீரரும் ஒருவர்.
இதையடுத்து கடந்த 13ம் தேதி அவரது உடல் தமிழகம் வந்தடைந்தது. ராணுவ விமானம் மூலமாக, மதுரை விமான நிலையத்திற்கு உடல் கொண்டு வரப்பட்டு ராணுவத்தினர் மரியாதை செலுத்திய பின்னர் சொந்த ஊருக்கு கொண்டு வரப்பட்டது.
அப்போது வீர மரணம் அடைந்த ராணுவ வீரரின் உடலுக்கு அஞ்சலி செலுத்தி விட்டு திரும்பிய நிதி அமைச்சர் பழனிவேல் தியாகராஜன் கார் மீது பாஜகவினர் காலணியை வீசினர். இதனால் அங்கு பெரும் பரபரப்பு ஏற்பட்டது.
இது தொடர்பாக மதுரை, அவனியாபுரம் காவல் நிலைய போலீசார் வழக்குப்பதிவு செய்து மதுரையை சேர்ந்த பாஜகவினர் 6 பேரை அதிரடியாக கைது செய்து நடவடிக்கை மேற்கொண்டுள்ளனர்.
இந்நிலையில் மதுரை மாநகர் மாவட்ட பாஜக தலைவர் டாக்டர் சரவணன் திடீரென அமைச்சர் பிடிஆர் பழனிவேல் தியாகராஜன் வீட்டிற்கு நேரில் சென்று தன் வருத்தத்தை பதிவு செய்தார்.
இதை தொடர்ந்து செய்தியாளர்களை சந்தித்த மாவட்ட பாஜக தலைவர் டாக்டர் சரவணன், ‘எனக்கு வெறுப்பு அரசியல், மத அரசியல் ஒத்துவரவில்லை. மனதில் இருக்கும் விஷயத்தை அமைச்சரிடம் தெரிவித்தேன்.
பாஜகவில் நான் தொடர போவதில்லை’ என, அறிவித்த நிலையில் பாஜக கொள்கைக்கு விரோதமாக நடந்துகொண்டதாக குற்றம்சாட்டி, டாக்டர் சரவணனை கட்சியில் இருந்து நீக்கி மாநில தலைவர் அண்ணாமலை உத்தரவிட்டார்.
இந்த நிலையில் டாக்டர் சரவணன் மீண்டும் திமுகவில் இணையலாம் என கூறப்பட்ட போதிலும், அவருக்கு அறிவாலயம் வாசல் கதவை திறக்காமலேயே உள்ள விவகாரம் அவரது ஆதரவாளர்கள் மத்தியில் கவலையை ஏற்படுத்தி உள்ளது.
பாஜகவில் இருந்து சரவணன் நீக்கப்பட்ட நிலையில், தற்காலிக நகர பொறுப்பாளராக மாவட்ட தலைவர் மகா.சுசீந்திரன் நியமிக்கப்பட்டுள்ளாரே தவிர மதுரை மாநகரத்துக்கு மாவட்ட பாஜக தலைவர் பதவி இன்னமும் நிரப்பட்டாமல் உள்ளது.
எனவே காலி இடத்திற்கு தலைவரை நியமிக்க மாநில நிர்வாகம் நடவடிக்கை மேற்கொண்டுள்ளது. இந்த பதவிக்கு, பொருத்தமானவரை தேடும் படலம் நடப்பதால் நிர்வாகிகளிடையே கடும் போட்டி ஏற்பட்டுள்ளதாக கூறப்படுகிறது.
இந்த ரேசில் பாஜ முன்னாள் நகர தலைவர்கள் சீனிவாசன், சசிராமன், மண்டல பொறுப்பாளர் கதலி நரசிங்கபெருமாள், துணை தலைவர் ஜெயவேல், எம்.எஸ்.ஷா மற்றும் பாஜகவை சேர்ந்த பலர் தலைவர் பதவிக்கு குறிவைத்து காய்களை நகர்த்தி வருவதாக தகவல் வெளியாகி உள்ளது.
அதே சமயம், தலைவர் பதவிக்கு போட்டியிடுகின்ற வசதி படைத்தவர்களிடம் கொள்கை இல்லை என்றும், கொள்கைவாதிகள் வசதியற்றவர்களாகவும் இருப்பதாக கூறப்படுவதாலேயே நியமனம் தாமதம் ஆவதாக முக்கிய நிர்வாகிகளே காதை கடிக்கின்றனர்.