டிரேட்மார்க் தோற்றம்:
கருப்பு, சிகப்பு, வெள்ளை நிறங்கள் கொண்ட அதிமுக கரை வேட்டி… பாக்கெட்டில் ஜெயலலிதாவின் படம் தெரியும்படியான வெள்ளை நிற சட்டை… நெற்றியில் பளிச்சிடும் விபூதி, குங்குமம்… இவற்றுடன் கிளீ்ன் ஷேவ் செய்யப்பட்ட முகம்….இதுதான் ஓ.பன்னீர்செல்வத்தின் டிரேட்மார்க் தோற்றம். கூடவே இருகரம் கூப்பி அவர் வணக்கம் தெரிவிக்கும் பாங்கும் (மேனரிசம்) அரசியல் வட்டாரத்தில் படுபிரபலம்.
தான் முதல்வராக இருந்த காலத்திலும் சரி… அண்மையில் அதிமுக சந்தித்த ஒற்றைத் தலைமை யுத்த காலத்திலும் சரி…. தமது டிரேட்மார்க் தோற்றத்தையும், மேனரிசத்தையும் பெரும்பாலும் மாற்றாதவராகவே வலம் வந்து கொண்டிருந்தார் ஓபிஎஸ்.
வெண்தாடி:
அப்படிபட்டவர், ஜூலை 11 இல் நடைபெற்ற அதிமுக பொதுக்குழு கூட்டம் குறித்த தமது மேல்முறையீட்டு வழக்கின் தீர்ப்புக்கு பின்னர் கடந்த இரு தினங்களாக ஊடகங்களுக்கு ஓபிஎஸ் உற்சாகமாய் பேட்டி அளித்து வருகிறார். ஓபிஎஸ்சின் இந்த பேட்டியை பார்க்கும் அவரது ஆதரவாளர்கள், அதிமுக தொண்டர்கள் மற்றும் பொதுமக்கள் என அனைத்து தரப்பினரும் பரவலாக எழுப்பப்பட்டுவரும் மில்லியன் டாலர் கேள்வி… ஓபிஎஸ் தமது டிரேட்மார்க் தோற்றத்துக்கு மாறாக வெண்தாடியுடன் ஏன் தோற்றமளிக்கிறார்?… இதன் ரகசியம், பின்னணி என்ன என்பதுதான்..!
வேண்டுதலா?:
இதுகுறித்து ஓபிஎஸ் ஆதரவாளர்கள் சிலரிடம் கேட்டால், ‘ எம்ஜிஆர், ஜெயலலிதா ஆகிய இரு தலைவர்கள் கட்டிக்காத்து லளர்த்த அதிமுகவில் எப்போதும்போல் அனைவரும் ஒற்றுமையாக செயல்பட்டு கட்சியை முன்னேற்ற பாதையில் கொண்டு செல்ல வேண்டும் என்று விரும்புபவர் ஓபிஎஸ். ஆனால் அவரது விருப்பதுக்கு மாறாக அண்மையில் சில கசப்பான நிகழ்வுகள் (பொதுக்குழு) கட்சியில் நடந்துவிட்டது.
அந்த நிகழ்வுகள் குறித்த வழக்கில் நல்ல தீர்ப்பு வர வேண்டும் ஓபிஎஸ் குலதெய்வத்துக்கு வேண்டி கொண்டிருக்கலாம். அதன் காரணமாக அவர் தாடி வளர்த்து கொண்டிருக்கலாம். இல்லையென்றால் கடந்த ஆண்டு காலமான அவரது மனைவிக்கு விரைவில் முதலாம் ஆண்டு நினைவு தினம் வருகிறது. அதற்காக அவர் வெண்தாடி வளர்த்திருக்கலாம்’ என்று விளக்கம் அளிக்கின்றனர் அவர்கள்.
திடீர் மாற்றம்:
சர்வதேச செஸ் ஒலிம்பியாட் போட்டி தொடக்க விழாவில் பங்கேற்க கடந்த மாத இறுதியில் பிரதமர் மோடி சென்னை வந்திருந்தார். அப்படியே அண்ணா பல்கலைக்கழக பட்டமளி்ப்பு விழாவிலும் கலந்துவிட்டு டெல்லி திரும்பிய அவரை, சென்னை விமான நிலையம் சென்று வழியனுப்பி வைத்தார் ஓபிஎஸ்.
அப்போதும் அவர் தமது வழக்கமான ஓயிட் அண்ட் ஒயிட் உடையிலும், கிளீன் ஷேவ் முகத்துடன்தான் தோற்றமளித்தார். ஆனால் தற்போது திடீரென அவர் வெண்தாடியுடன் இருக்கவே, அதனை சார்ந்து பல்வேறு கேள்விகள் பொதுவெளியில் எழுப்பப்பட்டு வருகின்றன.