ஆசிரியர்கள், மாணவர்கள் தங்களின் கையெழுத்தை தமிழில் இட வேண்டும் என்று தமிழக பள்ளிக் கல்வித் துறை அறிவுறுத்தி உள்ளது.
இது குறித்து தமிழக பள்ளிக் கல்வித் துறை வெளியிட்டுள்ள அறிவிப்பில், “உயர்நிலை, மேல்நிலைப் பள்ளிகளில் பணியாற்றும் ஆசிரியர்கள், அலுவலர்கள் அனைவரும், இனிஷியலை, தமிழில் தான் எழுத வேண்டும் என தமிழக அரசு அண்மையில் உத்தரவிட்டது.
அதன்படி, மாவட்ட முதன்மை கல்வி அலுவலர்களுக்கு, பள்ளி கல்வித் துறை இயக்குனர் பிறப்பித்திருந்த உத்தரவில், உயர்நிலை, மேல்நிலைப் பள்ளிகளில் பணியாற்றும் ஆசிரியர்கள், அலுவலர்கள் அனைவரும், தங்கள் இனிஷியல் மற்றும் பெயரைத் தமிழில் தான் எழுத வேண்டும். அரசு விழா, சுற்றறிக்கைகள் அனைத்தும் தமிழிலேயே இருக்க வேண்டும். இதை முதன்மை கல்வி அலுவலர்கள், தங்களது பகுதி ஆசிரியர்கள், அலுவலர்களுக்கு அறிவுறுத்த வேண்டும்” எனத் தெரிவிக்கப்பட்டு இருந்தது.
இந்நிலையில் தமிழக அரசு ஆணையை சுட்டிக்காட்டி கல்வி ஆணையர் பள்ளி தலைமை ஆசிரியர்களுக்கு அனுப்பியுள்ள சுற்றறிக்கையில், “பள்ளி மாணவர்கள் தங்கள் முன்னெழுத்தை தமிழில் தான் எழுத வேண்டும். கையொப்பத்தையும் தமிழில் இட வேண்டும். வருகைப் பதிவேடு உள்ளிட்டவற்றில் மாணவர்கள் பெயரை எழுதும் போது முன்னெழுத்தையும் தமிழிலேயே பதிவு செய்திட வேண்டும் அறிவுறுத்தப்பட்டு உள்ளது.