அத்தியாவசியப் பொருட்களின் விலைவாசி உயர்வை கருத்தில் கொண்டு மத்திய, மாநில அரசு ஊழியர்களுக்கு ஆண்டுக்கு இருமுறை அகவிலைப்படி உயர்வு அளிக்கப்பட்டு வருகிறது.
இதன்படி, ஆகஸ்ட் 15 ஆம் தேதி நாட்டின் 75 ஆவது சுதந்திர தின கொண்டாட்டத்தின்போது தமிழக அரசு ஊழியர்ககள் மற்றும் ஆசிரியர்களுக்கு இனிப்பான செய்தியாக இருக்கட்டுமே என்று அகவிலைப்படி 3 %அதிகரிக்கப்படுவதாக முதல்வர் ஸ்டாலின் அறிவித்தார். முதல்வரின் இந்த அறிவி்ப்பை அடுத்து அரசு ஊழியர்கள் மற்றும் ஆசிரியர்களுக்து 31% ஆக இருந்து வந்த DA 34% ஆக உயர்த்தப்பட்டுள்ளது.
அரசு ஊழியர்கள், ஆசிரியர்களை தொடர்ந்து அரசு துறைகளில் பணியாற்றும் ஐஏஎஸ் மற்றும் ஐபிஎஸ் உயரதிகாரிகளுக்கும் அகவிலைப்படி 3% அகவிலைப்படி உயர்த்தப்படுவதாக தமிழக அரசு தற்போது அறிிவித்துள்ளது. இந்த DA உயர்வானது ஜூலை 1 ஆம் தேதி முதல் கணக்கில் கொள்ளப்படும் என்றும் தெரிவித்துள்ளது.
இப்படி அரசு ஊழியர்கள், ஆசிரியர்கள், அரசு உயரதிகாரிகள் என மத்திய, மாநில அரசு ஊழியர்கள் ஆண்டுதோறும் தவறாமல் இரண்டு முறை DA உயர்த்தப்பட்டு வருகிறது. ஆனால் இன்றைய கார்ப்பரேட் யுகத்தில் அரசுத் துறைகளை ஒப்பிடும்போது தனியார் நிறுவனங்களே அதிக வேலைவாய்ப்புகளை அளிப்பவையாக உள்ளன.
இதன் பயனாக எண்ணிக்கையின் அடிப்படையில் அரசு ஊழியர்களைவிட தனியார், கார்ப்பரேட் நிறுவனங்களின் பணியாளர்களே அதிகமாக இருந்து வரும் நிலையில் இவர்களுக்கும அரசு ஊழியர்களை போல அகவிலைப்படி கிடைக்கப்பெற அரசு ஆவன செய்யுமா என்ற கேள்வி எழுந்துள்ளது. ஏனென்றால், விலைவாசி உயர்வு என்பது அரசு ஊழியர்களுக்கு மட்டுமல்லாமல் தனியார் நிறுவன பணியாளர்கள், சுயதொழில் செய்பவர்கள், தினக்கூலிகள் என அனைவருக்கும் பொதுவானதுதானே? என்று துணைக் கேள்வியையும் எழுப்புகின்றனர் இக்கேள்வியை முன்வைப்பவர்கள்.
‘3%, 4% என ஒற்றை இலக்க விகிதத்தில் அறிவிக்கப்படும் அகவிலைப்படி உயர்வு என்பது தங்களது அடிப்படை ஊதியத்தில்தான் (Basic Salary) கணக்கிடப்பட்டு தரப்படுகிறது. ஆனால், பெரும்பாலான தனியார் நிறுவன ஊழியர்களுக்கு ஆண்டுக்கு ஒருமுறை அளிக்கப்படும் ஊதிய உயர்வே அவர்களின் மொத்த ஊதியத்தை (Gross Salary)அடிப்படையாக கொண்டு வழங்கப்படுகிறது.
இந்த நுட்பமான வேறுபாட்டை கருத்தி்ல் கொள்ளாமல் DA உயர்வு, தீபாவளி, பொங்கல் போனஸ் அது இதுவென தங்களுக்கு எப்போது பார்த்தாலும் அரசு சலுகைகளை வாரி வழங்கி வருவதாக தவறான கண்ணோட்டம் பொதுமக்கள் மத்தியில் இருந்து வருகிறது. தங்களை காரணம்காட்டி தனியார் நிறுவன ஊழியர்களுக்கும் அகவிலைப்படி உயர்வு கேட்பது முறையல்ல’ என்கின்றனர் அரசு ஊழியர்கள்.
மாதந்திர டார்கெட், காலாண்டு பணி மதிப்பீடு என பல்வேறு காரணிகளை அடிப்படையாக கொண்டுதான் தங்களுக்கு ஊதிய உயர்வு வழங்கப்படுகிறது. கொரோனா போன்ற பேரிடர் காலங்களில் நிறுவனத்தின் ஆண்டு வருவாய் குறைந்தாலோ, வணிகம் பாதிக்கப்பட்டலோ அந்த ஆண்டு ஊதிய உயர்வு கூட தங்களுக்கு அளிக்கப்படாமல் போவதும் உண்டு.
ஆனால் அரசு ஊழியர்களுக்கு அப்படி இல்லை. அரசு எவ்வளவு நிதி நெருக்கடியில் இருந்தாலும் DA, போனஸ் போன்ற பணப்பலன்கள் அவர்களுக்கு பெரும்பாலான நேரங்களில் கொடுக்கதான் செய்யப்படுகிறது. விலைவாசி உயர்வு அனைவருக்கும் பொதுவானதாக இருக்கும்போது, Professional Tax, Income Tax என அரசுக்கு வரிகளை கட்டும் தங்களுக்கும் DA கிடைக்கப்பெற அரசு ஆவன செய்ய வேண்டும் என்று ஆதங்கப்படுகின்றனர் தனியார் பணியாளர்கள். இவர்களின் ஆதாங்கத்தை கருத்தில் கொள்ளுமா அரசு?