பாஜக பிரமுகரை கொல்ல முயற்சி.. கைதாகி ஜாமினில் வந்த காங்கிரஸ் கவுன்சிலருக்கு பாலாபிஷேகம்..

மத்திய பிரதேசத்தில் உள்ள இந்தூர் மாநகராட்சிக்கு கடந்த மாதம் தேர்தல் நடந்தது. இதில் 22வது வார்டில் காங்கிரஸ் கட்சியின் ராஜூ பதோரியா போட்டியிட்டார். இவரை எதிர்த்து பாஜகவை சேர்ந்த சந்துராவ் ஷிண்டே களமிறங்கினார். இந்த வார்டில் இவர்கள் 2 பேருக்கும் இடையே கடும் போட்டி ஏற்பட்டது.

இதையடுத்து ஏற்பட்ட தகராறில் காங்கிரஸ் வேட்பாளர் ராஜூ பதோரியா தன்னை எதிர்த்து போட்டியிட்ட பா.ஜனதா வேட்பாளர் சந்துராவ் ஷிண்டேவை சரமாரியாக தாக்கினார். இதனால் பயந்துபோன அவர் சம்பவம் குறித்து போலீசில் புகார் செய்தார். அதன்பேரில் போலீசார் கொலை முயற்சி வழக்குப்பதிவு செய்தனர். காங்கிரஸ் கட்சியின் ராஜூ பதோரியாவை கைது செய்தனர். இதையடுத்து அவர் சிறையில் அடைக்கப்பட்டார்.

இதற்கிைடையே தேர்தல் முடிவு வந்தது. இதில் சிறையில் இருந்த நிலையில் காங்கிரஸ் கட்சியின் ராஜூ பதோரியா வெற்றி பெற்றார். இதன்மூலம் கவுன்சிலரான அவர் ஜாமின் கோரி நீதிமன்றத்தில் மனு செய்தார். இந்த மனு மீது விசாரணை நடத்திய நீதிமன்றம் அவருக்கு ஜாமீன் வழங்கியது. இதையடுத்து அவர் சிறையில் இருந்து விடுதலை செய்யப்பட்டார். சிறையில் இருந்து வெளியே வந்த ராஜூ பதோரியாவுக்கு அவரது ஆதரவாளர்கள் மாலை அணிவித்து மேளதாளத்துடன் வரவேற்றனர். வாத்தியங்கள் முழங்க அவரை சிறையில் இருந்து ஊர்வலமாக அழைத்து சென்றனர். மேலும் அவர் மீது பால் ஊற்றி பாலாபிஷேகம் செய்தனர்.

தற்போது இதுதொடர்பான வீடியோ இணையதளங்களில் வேகமாக பரவி வருகிறது. இதனை பாஜகவினர் கடுமையாக விமர்சனம் செய்து வருகின்றனர். சமீபத்தில் குஜராத் மாநிலத்தில் பில்கிஸ் பானு கூட்டு பலாத்கார வழக்கில் சிறையில் இருந்து நன்னடத்தை அடிப்படையில் விடுவிக்கப்பட்ட 11 பேருக்கு ஆரத்தி எடுக்கப்பட்டது. இதனை காங்கிரஸ் கட்சியினர் கடுமையாக விமர்சித்த நிலையில் கொலை முயற்சி வழக்கில் சிறை சென்று ஜாமீனில் வெளியே வந்த காங்கிரஸ் கவுன்சிலருக்கு பாலாபிஷேகம் செய்ததை பாஜகவினர் கடுமையாக விமர்சித்து வருகின்றனர்.