டெல்லியில், பாஜகவின், ஆப்பரேஷன் லோட்டஸ் தோல்வி அடைந்து விட்டதாக, அம்மாநில முதலமைச்சர் அரவிந்த் கெஜ்ரிவால் தெரிவித்து உள்ளார்.
டெல்லியில், முதலமைச்சர் அரவிந்த் கெஜ்ரிவால் தலைமையிலான ஆம் ஆத்மி கட்சி நடைபெற்று வருகிறது. முதலமைச்சர் அரவிந்த் கெஜ்ரிவால் தலைமையிலான அரசிலும், கட்சியிலும், இரண்டாவது இடத்தில் இருப்பவர், துணை முதலமைச்சர் மணீஷ் சிசோடியா.
அண்மைையில், இவரது வீட்டில், மதுபானக் கொள்கை விதிமீறல் தொடர்பாக, சிபிஐ அதிகாரிகள் சோதனை நடத்தினர். சுமார் 12 மணி நேரம் நடைபெற்ற சோதனையில் பல முக்கிய ஆவணங்கள் கைப்பற்றப்பட்டதாகக் கூறப்படுகிறது. இதைத் தொடர்ந்து, ஆம் ஆத்மி கட்சியில் இருந்து விலகி, பாஜகவில் சேர்ந்தால், சிபிஐ வழக்குகளை ரத்து செய்வதாகவும், பாஜக முதலமைச்சர் வேட்பாளராக முன்னிலைப்படுத்துவதாகவும், அக்கட்சி தலைவர்கள் பேரம் பேசியதாக, துணை முதலமைச்சர் மணீஷ் சிசோடியா குற்றம் சாட்டினார்.
இதன் பின்னர், பாஜகவில் சேர்ந்தால் 20 கோடி ரூபாய் தருவதாக அக்கட்சித் தலைவர்கள் பேரம் நடத்தியதாக, ஆம் ஆத்மி எம்எல்ஏக்கள் குற்றம் சாட்டினர். ஆனால் இந்த குற்றச்சாட்டுகளை பாஜக திட்டவட்டமாக மறுத்தது. இந்த விவகாரம் டெல்லி அரசியலில் பரபரப்பை ஏற்படுத்தியது.
இதை அடுத்து, ஆம் ஆத்மி எம்எல்ஏக்கள் அனைவரும், தங்கள் பக்கள் இருப்பதை வெளிகாட்ட, முதலமைச்சர் அரவிந்த் கெஜ்ரிவால் தலைமையிலான அரசு சிறப்பு சட்டப்பேரவைக் கூட்டத்தொடரை கூட்டியது. அண்மையில் இந்தக் கூட்டத்தொடரில் பேசிய முதலமைச்சர் அரவிந்த் கெஜ்ரிவால், மக்களால் தேர்ந்தெடுக்கப்பட்ட அரசுகளை கவிழ்ப்பதில், பாஜக ஒரு சீரியல் கில்லர் என்றும், ஆம் ஆத்மி அரசு வலுவாக இருப்பதை காட்ட, திங்கட்கிழமை நம்பிக்கை வாக்கெடுப்பு தீர்மானம் தாக்கல் செய்யப்படும் என்றும் பேசினார்.
இதன்படி இன்று, டெல்லி சட்டப்பேரவையில், முதலமைச்சர் அரவிந்த் கெஜ்ரிவால், நம்பிக்கை வாக்கெடுப்பு தீர்மானத்தை தாக்கல் செய்தார். இதன் பின் அவர் பேசியதாவது:
மத்திய பிரதேசம், பீகார், கோவா மகாராஷ்டிரா மற்றும் அசாம் உட்பட நாடு முழுவதும் உள்ள பல்வேறு மாநில அரசுகளை கவிழ்க்க பாஜக இதுவரை 277 எம்எல்ஏக்களை விலைக்கு வாங்கி உள்ளது. அடுத்த 15 நாட்களுக்குள் ஜார்க்கண்ட் அரசை கவிழ்க்க பாஜக முயற்சி செய்து வருகிறது.
ஆம் ஆத்மி எம்எல்ஏக்களையும் விலைக்கு வாங்க பாஜக முயற்சித்தது. இந்த நம்பிக்கைத் தீர்மானத்தின் மூலம், ஆம் ஆத்மி கட்சி எம்.எல்.ஏ.வை யாரும் விலைக்கு வாங்கவில்லை என்பதை டெல்லி மக்களுக்கு காட்ட விரும்பினோம். டெல்லியில் ஆம் ஆத்மி கட்சி அரசைக் கவிழ்க்கும் திட்டமான “ஆப்பரேஷன் லோட்டஸ்” தோல்வி அடைந்து விட்டது.
இவ்வாறு அவர் கூறினார்.
முதலமைச்சர் அரவிந்த் கெஜ்ரிவால் தலைமையிலான அரசு மீது, நாளை நம்பிக்கை வாக்கெடுப்பு நடைபெற உள்ளது.