ராகுல் காந்தியை வெற்றிகரமான தலைவராக உருவாக்க முயற்சித்தோம். ஆனால் அவர் விருப்பம் காட்டவில்லை என, காங்கிரஸ் கட்சியில் இருந்து விலகிய குலாம் நபி ஆசாத் தெரிவித்து உள்ளார்.
காங்கிரஸ் மூத்தத் தலைவராக இருந்த குலாம் நபி ஆசாத், கடந்த 26 ஆம் தேதி, அக்கட்சியில் இருந்து விலகினார். பல ஆண்டுகள் காங்கிரஸ் கட்சியின் பல்வேறு முக்கியப் பொறுப்புகளில் இருந்த குலாம் நபி ஆசாத், அக்கட்சியில் இருந்து விலகியது, பரபரப்பை ஏற்படுத்தியது.
மேலும், 2019 நாடாளுமன்ற மக்களவைத் தேர்தல் தோல்விக்கு, ராகுல் காந்தியின் குழந்தைத்தனமான நடவடிக்கைகளே காரணம் என்றும் குலாம் நபி ஆசாத் கடுமையாக விமர்சனம் செய்தார். இதற்கிடையே, இந்த ஆண்டு இறுதியில் நடைபெற உள்ள ஜம்மு – காஷ்மீர் சட்டப்பேரவைத் தேர்தலை மையமாகக் கொண்டு, புதியக் கட்சி ஒன்றை, குலாம் நபி ஆசாத் தொடங்க இருப்பதாக தகவல் வெளியாகி உள்ளது.
இந்நிலையில், டெல்லியில் இன்று, செய்தியாளர்களிடம் குலாம் நபி ஆசாத் கூறியதாவது:
காங்கிரஸ் கட்சியில் இருந்து வெளியேற நரேந்திர மோடியை ஒரு காரணமாகக் கூறுவது சாக்குபோக்கு. காங்கிரஸ் தலைமை குறித்து ஜி23 கடிதம் எழுதப்பட்டதில் இருந்தே காங்கிரசாருக்கு என்னிடம் பிரச்னை உள்ளது. அவர்களுக்கு யாரும் கடிதம் எழுதுவதையோ, கேள்விகளை எழுப்புவதையோ அவர்கள் எப்போதும் விரும்பவில்லை.
இதுவரை பல காங்கிரஸ் கூட்டங்கள் நடந்தன. ஆனால், ஒரு முடிவு கூட எடுக்கப்படவில்லை. காங்கிரஸ் கட்சியில் இருந்து வெளியேற என்னை அவர்கள் கட்டாயப்படுத்தினார்கள். காங்கிரஸ் கட்சியைச் சேர்ந்த சில நண்பர்களே என்னைப் பற்றி குற்றச்சாட்டை முன்வைக்கிறார்கள். காங்கிரஸ் கட்சியில் விரோதிகள் முன்னேறிக் கொண்டிருக்கிறார்கள். 30 ஆண்டுகளுக்கு முன்பு சோனியா காந்தி மீது எனக்கு இருந்த மரியாதை, ராகுல் காந்தி மீதான மரியாதை, இந்திரா காந்தியின் குடும்பத்தினருக்கும், ராஜிவ் காந்தி -சோனியா காந்தியின் மகனுக்கும் உரியது.
தனிப்பட்ட முறையில், அவரது நீண்ட ஆயுளுக்காக நான் பிரார்த்திக்கிறேன். ராகுல் காந்தியை வெற்றிகரமான தலைவராக உருவாக்க முயற்சித்தோம். ஆனால் அவருக்கு ஆர்வம் இல்லை. பாஜகவில் இணையப் போவதில்லை. இன்னும் 10 நாட்களில் புதிய கட்சி தொடங்கப் போகிறேன். பிரதமர் நரேந்திர மோடியை கசப்பான மனிதர் என்று நினைத்தேன்; ஆனால் அவர் மனித நேயத்தை காட்டினார். இவ்வாறு அவர் கூறினார்.