தமிழ்நாட்டில் உள்ள அனைத்து பல்கலைக்கழக துணைவேந்தா்கள் பங்கேற்கும் மாநாடு சென்னை கிண்டியில் உள்ள அண்ணா பல்கலைக்கழக வளாகத்தில் இன்று (ஆகஸ்ட் 30) காலை தொடங்கியது. இந்த மாநாட்டுக்கு முதல்வா்
தலைமை தாங்குகிறார்.
ஆகஸ்ட் 17ஆம் தேதி இந்த மாநாடு நடைபெறுவதாக அறிவிக்கப்பட்டிருந்தது. ஆனால், முதல்வா் மு.க.ஸ்டாலினின் டெல்லி பயணத்தை முன்னிட்டு இந்தக் கூட்டம் அப்போது ஒத்திவைக்கப்பட்டது.
வேறொரு நாளில் மாநாடு நடைபெறும் என்று உயர்கல்வித் துறை அமைச்சர் க.பொன்முடி கூறியிருந்தார். இந்நிலையில் இன்று துணை வேந்தர்கள் மாநாடு தொடங்கியிருக்கிறது.
பல்கலைக் கழக துணைவேந்தர்களை மாநில அரசே நியமிக்கும் சட்ட மசோதா தமிழ்நாடு சட்டப்பேரவையில் நிறைவேற்றப்பட்டது. இதற்கு பாஜக, அதிமுக உள்ளிட்ட எதிர்கட்சிகள் எதிர்ப்பு தெரிவித்தன. ஆனால், மற்ற கட்சிகள் ஆதரவுடன் மசோதா நிறைவேற்றப்பட்டு ஆளுநரின் ஒப்புதலுக்கு அனுப்பி வைக்கப்பட்டது. ஆனால், அதற்கு ஆளுநர் அந்த மசோதாவுக்கு அனுமதி தர மறுத்து கிடப்பில் போட்டுள்ளார்.
தமிழ்நாட்டின் பல்கலைக்கழக வேந்தராக உள்ள ஆளுநர் ரவி தலைமையில் ஊட்டியில் அனைத்து மாநிலப் பல்கலைக்கழகங்களின் துணைவேந்தர்கள் மாநாடு நடைபெற்றது. அதைத்தொடர்ந்து மதுரையில் நடைபெற்ற காமராஜர் பல்கலைக்கழக பட்டமளிப்பு விழா சர்ச்சையானது. அதை அமைச்சர் பொன்முடி புறக்கணித்தார்.
இந்நிலையில் இன்று முதலமைச்சர் தலைமையில் பல்கலைக்கழக துணை வேந்தர்கள் மாநாடு நடைபெற்று வருகிறது.
இந்த மாநாட்டில் மாநில கல்விக்கொள்கையை உருவாக்குவது, உயர்கல்வியில் தேர்ச்சி விகிதத்தை அதிகரிப்பது, கல்வியின் தரத்தை மேம்படுத்துவது உள்ளிட்டவை குறித்து ஆலோசனை நடத்தப்படும் என கூறப்படுகிறது.