பெங்களூரு: தமிழில் பல படங்களில் நடித்துள்ள ரம்யா இங்கு ‘குத்து ரம்யா’ என்று அழைக்கப்படுகிறார். கன்னடத்தில் ‘திவ்யா ஸ்பந்தனா’ என்ற பெயரில் நடித்தார். ஒருகட்டத்தில் காங்கிரஸ் கட்சியில் இணைந்து எம்பி ஆனார். அரசியலுக்கு சென்ற பிறகு சினிமாவில் நடிப்பதை குறைத்துக்கொண்டார். கடைசியாக கோடி ராமகிருஷ்ணா இயக்கிய ‘நாகராஹவு’ என்ற படத்தில் நடித்திருந்தார். இந்நிலையில், தற்போது 6 ஆண்டுகளுக்குப் பிறகு மீண்டும் அவர் திரைத்துறைக்கு வருகிறார். இம்முறை அவர் தயாரிப்பாளராக வருகிறார். நேற்று விநாயகர் சதுர்த்தியை முன்னிட்டு தனது புதிய தயாரிப்பு நிறுவனம் குறித்த அறிவிப்பை வெளியிட்டார். அவர் தொடங்கியுள்ள ஆப்பிள் பாக்ஸ் ஸ்டுடியோ சார்பில் தியேட்டர்களில் வெளியிடப்படும் திரைப்படங்களும், ஓடிடிக்கான திரைப்படங்களும், வெப்தொடர்களும் தயாரிக்கப்படும் என்றும், படப்பிடிப்புகளுக்கு தேவையான உபகரணங்களை வாடகைக்கு விடும் பணியை தொடர்ந்து செய்வேன் என்றும் தெரிவித்துள்ளார். ஆனால், மீண்டும் அவர் சினிமாவில் நடிப்பது குறித்து எதுவும் சொல்லவில்லை.
