இலங்கை அணி வெற்றி:சூப்பர் சுற்றுக்கு முன்னேற்றம்

ஆசிய கிண்ண கிரிக்கெட் தொடரில் இலங்கை அணி பங்களாதேஷ் அணியை 2 விக்கெட் வித்தியாசத்தில் வீழ்த்தி சூப்பர் 4 சுற்றுக்கு முன்னேறியது.

ஆசிய கிண்ண கிரிக்கெட் போட்டி ஐக்கிய அரபு அமீரகத்தில் நடைபெற்று வருகிறது.

டுபாயில் நேற்று (1) இலங்கை, பங்களாதேஷ் அணிகளுக்கிடையில்  போட்டி நடைபெற்றது.

இதில் நாணய சுழற்சியில் வெற்றி பெற்ற இலங்கை அணி களத்தடுப்பை தேர்வு செய்தது.

முதலில் களமிறங்கிய பங்களாதேஷ் அணி, நிர்ணயிக்கப்பட்ட 20 ஓவர்களில் 7 விக்கெட் இழப்பிற்கு 183 ஓட்டங்கள் பெற்றது. அந்த அணி வீரர் ஆசிப் உசைன் அதிகபட்சமாக 39 ஓட்டங்களும், மெகிடி ஹசன் 38 ஓட்டங்களும் பெற்றனர்.

இலங்கை அணியில் வனிந்து ஹசரங்க, சமிக கருணாரத்ன ஆகியோர் தலா 2 விக்கெட் எடுத்தனர்.

இதையடுத்து 184 ஓட்டங்கள் எடுத்தால் வெற்றி என்ற இலக்குடன் களமிறங்கிய இலங்கை அணியில் குசல் மெண்டிஸ் 37 பந்துகளில் 60 ஓட்டங்கள் அதிகபட்சமாக பெற்றார்.

இதற்கமைய இலங்கை அணி 19.2 ஓவர் முடிவில் 8 விக்கெட் இழப்பிற்கு 184 ஓட்டங்கள் அடித்து 2 விக்கெட் வித்தியாசத்தில் வெற்றி பெற்றது. இதன் மூலம்  சூப்பர் 4 சுற்றுக்கு இலங்கை அணி தகுதி பெற்றுள்ளமை குறிப்பிடத்தக்கது.