ஜூலை 11ஆம் தேதி நடைபெற்ற அதிமுக பொதுக்குழு செல்லும் என சென்னை உயர் நீதிமன்றம் தீர்ப்பளித்துள்ள நிலையில்
ஆதரவாளர்கள் இனிப்புகள் வழங்கி கொண்டாட்டத்தில் ஈடுபட்டுள்ளனர்.
சென்னை கிரீன்வேஸ் சாலையில் உள்ள எடப்பாடி பழனிசாமி இல்லத்தில் அதிமுக முன்னாள் அமைச்சர்கள், தலைமைக் கழக நிர்வாகிகள், தொண்டர்கள் கூடியுள்ளனர்.
அப்போது செய்தியாளர்களைச் சந்தித்த அதிமுக முன்னாள் அமைச்சர் ஜெயக்குமார், “அதிமுகவில் உள்ள ஒன்றரை கோடி தொண்டர்களுக்கும் மகிழ்ச்சியடையும் வகையில் உயர் நீதிமன்றம் தீர்ப்பை வழங்கியுள்ளது. ஜூலை 11ஆம் தேதி கூட்டப்பட்ட அதிமுக பொதுக்குழு செல்லும், தனி நீதிபதி உத்தரவு ரத்து ஆகிய இரு உத்தரவையும் அதிமுகவினர் வரவேற்று இனிப்புகள் வழங்கி எழுச்சியுடன் கொண்டாடி வருகின்றனர்.
இடைக்கால பொதுச்செயலாளர் எடப்பாடி பழனிசாமி என்ற அங்கிகாரத்தையும், ஒற்றைத் தலைமை செல்லும் என்ற அங்கீகாரத்தையும் உயர் நீதிமன்றம் வழங்கியுள்ளது. இதன்மூலம் ஓபிஎஸ் நீக்கப்பட்டது செல்லும். எம்ஜிஆர், ஜெயலலிதா ஆகியோர் எந்த அடிப்படையில் பொதுக்குழுவை கூட்டினார்களோ அதையே பின்பற்றி பொதுக்குழு கூட்டப்பட்டது.
ஓபிஎஸ் தரப்பு உச்ச நீதிமன்றத்தை நாட உள்ளதாக கூறுகிறார்களே கேவியட் மனு தாக்கல் செய்வீர்களா என்று செய்தியாளர்கள் கேள்வி எழுப்பினர். அதற்கு பதிலளித்த ஜெயக்குமார், “அது குறித்து சட்ட வல்லுநர்கள் ஆலோசித்து முடிவெடுக்கும். எங்கு சென்றாலும் எங்களுக்கு வெற்றி கிடைக்கும்” என்று பதிலளித்தார்.
அரசியலில் ஓ.பன்னீர் செல்வத்தின் எதிர்காலம் என்னவாக இருக்கும் என்று செய்தியாளர் ஒருவர் எழுப்பிய கேள்விக்கு ‘ஜீரோ’ என்று பதிலளித்தார்.