தமிழக பாஜக தலைவர் கே.அண்ணாமலை அடிக்கடி சர்ச்சையில் சிக்கி வருவது, பரபரப்பை ஏற்படுத்தி உள்ளது.
தமிழக பாஜக தலைவராக, முன்னாள் ஐபிஎஸ் அதிகாரி கே.அண்ணாமலை பொறுப்பேற்றதில் இருந்தே, திமுகவையும், தமிழக முதலமைச்சர் மு.க.ஸ்டாலினையும் தொடர்ந்து கடுமையாக விமர்சித்து வருகிறார். இவருக்கு, தமிழக அமைச்சர்கள் செந்தில் பாலாஜி, நாசர், மா.சுப்பிரமணியன் உள்ளிட்டோர் அவ்வப்போது பதிலடி கொடுத்து வருகின்றனர்.
தமிழக பாஜகவுக்கு அண்ணாமலை பொறுப்பேற்றதில் இருந்து, தமிழகத்தின் ஊடகங்களிலும், செய்தித்தாள்களிலும் தலைப்புச் செய்திகளில், பாஜக வருவதையும் பார்க்க முடிகிறது. மேலும், பாஜகவின் அணுகுமுறை மாறி உள்ளதாக கூறுகின்றனர், விவரம் அறிந்தவர்கள். பாஜகவுக்கு தலைவராக இருந்த தமிழிசை சவுந்தரராஜன், எல்.முருகன் ஆகியோர், கட்சியை வளர்த்தெடுப்பதற்கும், பிரபலப்படுத்துவதற்கும் எளிய நடைமுறைகளை பின்பற்றியதாகவும் அவர்கள் தெரிவிக்கின்றனர்.
கடந்த சில நாட்களுக்கு முன்பு, தமிழக நிதி அமைச்சர் பிடிஆர் பழனிவேல் தியாகராஜன் வாகனம் மீது பாஜகவினர் செருப்பு வீசிய சம்பவம் தேசிய அளவில் பரபரப்பை ஏற்படுத்தியது. இந்த சம்பவத்தில் பாஜக தலைவர் அண்ணாமலைக்கு தொடர்பு இருப்பதாகவும், அவர் பேசியதாக வெளியான ஆடியோ ஒன்று, தமிழக அரசியலில் புயலைக் கிளப்பி உள்ளது.
இது குறித்து விளக்கம் அளித்த அண்ணாமலை, “ஆடியோ என்னுடையது தான்; ஆனால், திமுக ஐடி விங் நிர்வாகிகள், ஆடியோவை திரித்து வெளியிட்டு உள்ளனர்” என, தெரிவித்தார். இந்த விவகாரம் முடிவடைவதற்குள், தமிழக நிதி அமைச்சர் பிடிஆர் பழனிவேல் தியாகராஜன் – பாஜக மாநிலத் தலைவர் அண்ணாமலை ஆகியோருக்கு இடையே, சமூக வலைதளமான ட்விட்டரில் வார்த்தைப் போர் ஏற்பட்டது. ட்விட்டரில் ஒருவரையொருவர் சரமாரியாக விமர்சித்துக் கொண்டனர்.
இப்படி பல்வேறு விவகாரங்களில், அண்ணாமலை பெயர் அடிபடுவது, கட்சித் தலைமைக்கு பிடிக்கவில்லை என்றும் கூறப்படுகிறது. இது தொடர்பான தமிழக பாஜக மூத்தத் தலைவர்களிடம், டெல்லி மேலிடத் தலைவர்கள் பேசி உள்ளதாகவும் கூறப்படுகிறது.
இதற்கிடையே, 2024 நாடாளுமன்ற மக்களவைத் தேர்தல் அசைன்மெட்டை, அண்ணாமலை சரியாக முடித்து கொடுத்தால், அவருக்கு மிகப்பெரிய பரிசு காத்திருப்பதாகவும் தகவல் வெளியாகி உள்ளது. மக்களவைத் தேர்தலில் தமிழகத்தில் பாஜக வெற்றி மற்றும் வாக்கு வங்கியை பொறுத்தே, அண்ணாமலை மாற்றப்படுவாரா அல்லது நீடிப்பாரா என்பது தெரிய வரும் என்கின்றனர் கமலாலய வட்டாரங்கள்..!