ஜார்க்கண்டில் நம்பிக்கை வாக்கெடுப்பில் ஹேமந்த் சோரன் அரசு வெற்றி!

ராஞ்சி: ஜார்க்கண்டில் நடந்த நம்பிக்கை வாக்கெடுப்பில் ஹேமந்த் சோரன் அரசு வெற்றி பெற்றது. அவருக்கு ஆதரவாக 48 வாக்குகள் கிடைத்தது. எதிர்க்கட்சிகள் வாக்களிக்கவில்லை. வாக்குப்பதிவு தொடங்கும் முன்பே பாஜக எம்எல்ஏக்கள் அவையில் இருந்து வெளிநடப்பு செய்தனர். ஜார்கண்ட் மாநிலத்தில் அரசியல் குழப்பம் நிலவி வரும் நிலையில், இன்று சிறப்பு சட்டப்பேரவை கூட்டத்தொடர் கூடியுள்ளது. இந்த ஒரு நாள் சிறப்பு அமர்வில், முதல்வர் ஹேமந்த் சோரன் நம்பிக்கை வாக்கெடுப்பு தீர்மானத்தை தாக்கல் செய்யவிருந்தார். சத்தீஸ்கரில் இருந்து காங்கிரஸ் மற்றும் ஜார்கண்ட் முக்தி மோர்ச்சா எம்.எல்.ஏக்கள் ராஞ்சி விதான் சபாவின் ஒரு நாள் சிறப்பு அமர்வில் கலந்து கொள்ள திரும்பினர். எம்.எல்.ஏ.க்கள் குதிரை பேர முயற்சிகளை தவிர்க்கும் வகையில் இந்த நடவடிக்கை எடுக்கப்பட்டுள்ளது. சட்டசபையில் நம்பிக்கை தீர்மானம் கொண்டு வந்த போது “பாஜக தலைமையில் ஆட்சிகள் இல்லாத மாநிலங்களில் ஜனநாயக முறைப்படி தேர்ந்தெடுக்கப்பட்ட அரசுகளை சீர்குலைக்க பாரதிய ஜனதா கட்சி முயற்சிப்பதாக ஜார்க்கண்ட் முதல்வர் ஹேமந்த் சோரன் குற்றம் சாட்டினார்.

சட்டப்பேரவையில் செய்தியாளர்களிடம் சோரன் பேசியதாவது,

அஸ்ஸாம் முதல்வர் ஹிமந்தா பிஷ்வா சர்மா ஜார்கண்ட் எம்எல்ஏக்களை “குதிரை பேரம்” செய்ய முயற்சிப்பதாகவும் அவர் கூறினார்.

“பாஜக ஆட்சி இல்லாத மாநிலங்களில், ஜனநாயக முறைப்படி தேர்ந்தெடுக்கப்பட்ட அரசுகளை சீர்குலைக்க முயற்சிக்கிறது. அஸ்ஸாம் முதல்வர் ஜார்க்கண்ட் எம்எல்ஏக்களிடம் பேரம் பேசினார். ஆளும் அரசின் எம்எல்ஏக்களை மிரட்டி, பண ஆசையைக் காட்டி எம்எல்ஏக்களை விலைக்கு வாங்கும் முயற்சியில் பாஜக ஈடுபட்டுள்ளது என்றார்.