மீண்டும் டீச்சராக மாறிய அமலாபால்
திருமணத்துக்கு முன்பு வரை பிசியான நடிகையாக நடித்து வந்த அமலாபால் திருமணத்திற்கு பின்பு குறிப்பாக விவாகரத்துக்கு பின்னர் அவரது படங்களின் எண்ணிக்கை கணிசமாக குறைந்து விட்டது. நண்பர்களுடன் சுற்றுலா, வடநாட்டு கோவில்களில் ஆன்மிக தேடல் என பர்சனல் வாழ்க்கைக்கு அதிக முக்கியத்துவம் கொடுத்து வரும் அமலாபால் சினிமாவில் மீண்டும் தன்னை நிலை நிறுத்திக் கொள்ள கடாவர் என்கிற படத்தை தானே தயாரித்து நடித்தார். அந்த படம் சமீபத்தில் ஓடிடி தளத்தில் வெளியான நிலையில் தற்போது தி டீச்சர் என்கிற மலையாள படத்தில் கதாநாயகியாக நடித்து வருகிறார் அமலாபால்.
ராட்சசி படம் போல ஆசிரியருக்கு முக்கியத்துவம் கொடுத்து உருவாகி வரும் இந்த படத்தில் டீச்சர் கதாபாத்திரத்தில் நடிக்கிறார் அமலாபால். இதற்கு முன் அவர் ராட்சசன் படத்திலும் டீச்சராக நடித்திருந்தார் என்பது குறிப்பிடத்தக்கது. பஹத் பாசில், சாய்பல்லவி நடித்த அதிரன் படத்தை இயக்கிய இயக்குனர் விவேக் தான் இந்த படத்தை இயக்குகிறார்.
ஆசிரியர்கள் தினத்தை முன்னிட்டு இந்த படத்தின் பர்ஸ்ட் லுக் நேற்று வெளியானது. நடிகர் மோகன்லால் இந்த படத்தின் பர்ஸ்ட் லுக் போஸ்டரை வெளியிட்டுள்ளார். இந்த படத்தின் இயக்குனர் விவேக் அடுத்ததாக மோகன்லால் நடிக்க இருக்கும் படத்தை இயக்க உள்ளார் என்பதும் இங்கே குறிப்பிடத்தக்கது.