நெடுஞ்சாலைத் துறை டெண்டர் முறைகேடு வழக்கில், பதில் மனு தாக்கல் செய்யும் வரை லஞ்ச ஒழிப்புத் துறை நடவடிக்கை எடுக்க தடை விதிக்க வேண்டும் என அதிமுக இடைக்கால பொதுச் செயலாளர் தாக்கல் செய்த மனுவை சென்னை உயர் நீதிமன்றம் நிராகரித்து உத்தரவிட்டு உள்ளது.
நெடுஞ்சாலைத் துறை டெண்டரில் 4,800 கோடி ரூபாய் அளவுக்கு முறைகேடு நடந்ததாக புகார் எழுந்தது. இது தொடர்பாக முன்னாள் முதலமைச்சரும், அதிமுக இடைக்கால பொதுச் செயலாளருமான எடப்பாடி பழனிசாமி மீது வழக்குப் பதிவு செய்யக் கோரி, திமுகவின் ஆர்.எஸ்.பாரதி சென்னை உயர் நீதிமன்றத்தில் வழக்கு தொடர்ந்தார்.
இந்த வழக்கில், நீதிமன்றம், சிபிஐ விசாரணைக்கு உத்தரவிட்டது. இதனை எதிர்த்து எடப்பாடி பழனிசாமி தொடர்ந்த வழக்கை விசாரித்த உச்ச நீதிமன்றம், சிபிஐ விசாரணை என்ற உத்தரவை ரத்து செய்து, வழக்கை சென்னை உயர் நீதிமன்றத்திற்கு அனுப்பி வைத்து விசாரணை நடத்த உத்தரவிட்டது.
இந்நிலையில், டெண்டர் முறைகேடு வழக்கில், பதில் மனு தாக்கல் செய்யும் வரை லஞ்ச ஒழிப்புத் துறை மேல் நடவடிக்கை எடுக்க தடை விதிக்க வேண்டும் என எடப்பாடி பழனிசாமி சென்னை உயர் நீதிமன்றத்தில் வழக்கு தொடர்ந்தார்.
இந்த வழக்கு இன்று விசாரணைக்கு வந்த போது, லஞ்ச ஒழிப்புத் துறை சார்பில் ஆஜரான வழக்கறிஞர், முறைகேடு வழக்கில் ஆரம்ப கட்ட விசாரணை அறிக்கை, கமிஷனரிடம் உள்ளதாக கூறினார். இதனை அடுத்து, பழனிசாமியின் கோரிக்கையை நிராகரித்த உயர் நீதிமன்றம், லஞ்ச ஒழிப்புத் துறை கமிஷனர் மேல் நடவடிக்கை எடுக்க தடையில்லை என வழக்கை தள்ளுபடி செய்து உத்தரவிட்டார்.