ஏழை மக்களுக்கு மலிவு விலையில் உணவு கிடைத்திட வேண்டும் என்ற முழக்கத்தை முதன்முதலில் மக்கள் மன்றத்தில் எடுத்து வைத்த மாபெரும் தலைவர் அறிஞர் அண்ணா. நாட்டில் யாரும் பசியோடு இருக்கக் கூடாது என்று பசிப்பிணி போக்குவதை அரசின் அடிப்படைக் கடமையாகக் கருதிய பேரறிஞர் அண்ணாவின் பிறந்தநாளில், முதலமைச்சரின் காலை உணவுத் திட்டத்தை முதல்வர் முத்துவேல் கருணாநிதி ஸ்டாலின் தொடங்கி வைத்துள்ளார்.
அரசு மற்றும் அரசு உதவி பெறும் பள்ளிகளில் மட்டும் சுமார் 50 லட்சத்துக்கும் மேற்பட்ட குழந்தைகள் படிக்கும் சூழலில், கல்வியோடு சேர்த்து, வறுமை ஒழிப்பு, ஊட்டச்சத்து குறைபாடு பிரச்சினையை தீர்ப்பதில் இந்த திட்டம் மிகப்பெரிய தாக்கத்தை எதிர்காலத்தில் ஏற்படுத்தக் கூடும். திமுக அரசு பொறுப்பேற்ற பின்னர் செயல்படுதிய திட்டங்களில் மிகவும் முக்கியமான வரலாற்றுசிறப்புமிக்க திட்டங்களில் ஒன்றுதான் இந்த காலை உணவுத்திட்டம். இந்த திட்டத்தில் கையெழுத்திட்டபோது பெருமகிழ்ச்சியடைந்ததாக முதல்வர் ஸ்டாலின் குறிப்பிட்டிருந்தார்.
அந்த மகிழ்ச்சியை, “கேசரியும் சாம்பாரும் கொடுத்தாங்க; நல்லாயிருந்திச்சு. ஸ்டாலின் அய்யா நல்லாயிருக்கியான்னு கேட்டாரு… ஊட்டி விட்டாரு.” என்று தனது மழலை குரலில் அழகுபொங்க பேசிய 2ஆம் வகுப்பு மாணவி ரித்திகாவிடம் இன்று காண முடிந்தது.
காமராஜர்
மதிய உணவுத் திட்டத்தை அறிவித்ததற்கு இணையான விஷயம் இது.
102 ஆண்டுகளுக்கு முன்னால், இதே செப்டம்பர் 16ஆம் தேதி திராவிட இயக்கத்தின் தாய் அமைப்பான நீதிக்கட்சித் தலைவர்களுள் ஒருவராக இருந்த சர். பிட்டி தியாகராயர் சென்னை மாநகராட்சியில் குழந்தைகளுக்கு மதிய உணவுத் திட்டம் அறிமுகப்படுத்தும் தீர்மானத்தை இயற்றினார். அந்த சிந்தனைக்கு வித்திட்டார் பண்டிதர் அயோத்திதாசர்.
இந்தியா விடுதலை அடைவதற்குச் சில மாதங்களுக்கு முன்பு நிதி நெருக்கடியைக் காரணமாகக் காட்டி ஆங்கிலேய அரசால் மதிய உணவுத் திட்டம் நிறுத்தப்பட்டது. அதற்குப் பிறகு 1955ஆம் ஆண்டு மீண்டும் மதிய உணவுத் திட்டத்தை பெருந்தலைவர் காமராஜர் முதலமைச்சராக இருந்த போது தொடங்கினார். அப்போது நிதிச்சுமை பற்றி அவரிடம் கருத்து தெரிவிக்கப்பட்டபோது, ‘நிதிச் செலவைப் பகிர்ந்துகொள்ள மக்களிடம் கையேந்தவும் நான் தயார்’ என்றார் காமராஜர். இந்த திட்டத்தை செயல்படுத்தியதில் அப்போதைய பொதுக் கல்வி இயக்குநர் நெ.து.சுந்தரவடிவேலுவுக்கு பெரும்பங்குண்டு.
வயிற்று பிழைப்புக்கு வழி இல்லாமல் பள்ளிக்கு வர இயலாமல் இருந்த பிள்ளைகள் அனைவரையும் பள்ளிக்கூடங்களுக்கு வரச் செய்ய வேண்டும். அதற்கு பள்ளிகளிலேயே மதிய உணவைக் கொடுப்பதுதான் சிறந்த வழி என்று சிந்தித்த காமராஜர் பெரும் பொருட்செலவையும் பொருட்படுத்தாமல் திறம்பட மதிய உணவு திட்டத்தை செயல்படுத்திக் காட்டினார். இன்று தமிழகம் கல்வியில் முன்னோடி மாநிலமாக திகழ்வதற்கு இந்த திட்டமே முக்கிய காரணம் என்றால் அது மிகையாகாது.
அதற்கு பின்னர் ஆட்சிக்கு வந்த திமுக மதிய உணவு திட்டத்தை தொடர்ந்து செயல்படுத்தியது. பேரறிஞர் அண்ணா இந்த திட்டத்தை தொடர்ந்து செயல்படுத்தினார். இதனை செழுமைப்படுத்தும் வகையில் கூடுதலாக ஊட்டச்சத்துத் திட்டத்தை 1971ஆம் கையில் எடுத்தார் அப்போதைய முதல்வர் கலைஞர் கருணாநிதி. அந்தக் காலத்தில் பேபி ரொட்டி என்பதை குழந்தைகள் அனைவருக்கும் வழங்கியது கலைஞர் கருணாநிதி தலைமையிலான திமுக அரசு. மதிய உணவு திட்டத்தை விரிவுபடுத்தி, சத்துணவு திட்டம் கொண்டு வந்தார் எம்.ஜி.ஆர். அதன்பிறகு திமுக ஆட்சிக்கு வந்ததும் இந்த திட்டம் முடக்கப்படும் என அனைவரும் கருதினார்கள். ஆனால், கலைஞரோ பெயரில் இருந்த ‘சத்து’ உணவில் இல்லை என்று கருதி உண்மையான சத்துணவை வழங்கப்போகிறேன் என்று சூளுரைத்தார்.
முதலில், வாரம்தோறும் ஒரு முட்டை, பின்னர் இரண்டு முட்டை என படிப்படியாக அதிகரித்து, வாரத்துக்கு ஐந்து நாட்களும் சனி, ஞாயிறு நீங்கலாக முட்டை வழங்கப்படும் என அறிவித்தார். முட்டை சாப்பிடாதவர்களுக்கு வாழைப்பழம் வழங்கப்படும் என அறிவித்தார். அத்துடன், கொண்டைக் கடலை, பச்சைப்பயிறு, வேகவைத்த உருளைக் கிழங்கு ஆகியவற்றையும் சேர்த்துக் கொடுத்தார். மறைந்த முதல்வர் ஜெயலலிதா ஆட்சி காலத்தில் கலவை சாதம் வழங்கப்பட்டது. இப்படி, தமிழகத்தை ஆண்ட திராவிட கட்சிகள், மாணவர்களுக்காக உணவு வழங்கலை மெறுகேற்றி வந்திருக்கின்றன.
அதந்தொடர்ச்சியாக, காலை உணவுத் திட்டத்தை முதல்வர் ஸ்டாலின் தொடங்கி வைத்துள்ளார். ‘பிள்ளைகள் என்ன காலையில் சாப்பிடாமலா வருகிறார்கள்?’ என்ற திட்டத்துக்கு எதிரான குரல்களும் கேட்கப்படுகின்றன. உண்மையில், சாப்பிடாமலா வருகிறார்கள் என்றால் ஆம் என்பதுதான் அதற்கு பதிலாக வரும். பெரும்பாலான பள்ளிகளில் ஏழைக் குழந்தைகள் சாப்பிடாமல்தான் வருகின்றனர். பசியால் அரை மயக்கத்தில் அமர்ந்திருக்கின்றன. காமராஜர் காலத்து வறுமையும், பசியும் இன்றைக்கு இல்லை என்றாலும், பசி இன்னமும் முழுமையாக காணாமல் போய்விடவில்லை. சரிவிகித சமச்சீர் உணவு சாத்தியமற்றதாகவே இருக்கிறது. ஊட்டச்சத்து குறைபாடு குழந்தைகளிடம் இருக்கவே செய்கிறது என்கின்றன இதுதொடர்பான ஆய்வுகள். பள்ளிகளுக்கு காலையில் வரும் குழந்தைகள், கூலி வேலைக்கு செல்லும் தந்தையோ, தாயோ வாங்கிக் கொடுக்கும் டீயையும், ரஸ்கையும் உண்டு விட்டு வருகின்றன.
“பள்ளிகளில் காலை உணவுத் திட்டம் என்பது அமெரிக்காவில் US Department of Agriculture மூலம் பல மாநிலங்களில் நடைமுறைபடுத்தப்பட்டு வருகிறது. இதேபோல, ஐரோப்பா நாடுகளிலும், குறிப்பாக 3 ஆண்டுகளுக்கு முன்னர் ஃபிரான்ஸ் நாட்டிலும், காலை உணவுத்திட்டம் அறிமுகப்படுத்தப்பட்டுள்ளது.” என்று முதல்வர் ஸ்டாலின் குறிப்பிட்டுள்ளார். கல்விக்கும் உணவுக்கும் உள்ள தொடர்பு அவசியமானதாக கருதப்படுவதாலேயே, உலக நாடுகள் பலவற்றிலும் காலை உணவுத்திட்டம் அமலில் உள்ளது. பள்ளிகளில் காலை உணவு வழங்குவதால் அந்த நாட்டு மாணவர்கள் கற்றல் திறன் மேம்படுவதாகவும், மாணவர் வருகையை அதிகரிப்பதாகவும் பல ஆய்வு முடிவுகள் எடுத்துக்காட்டுகின்றன.
மறைந்த முதல்வர்கள் கலைஞர் கருணாநிதி, ஜெயலலிதா ஆகிய இருவரும் இத்திட்டத்தின் முக்கியத்துவத்தை உணர்ந்திருந்த காரணத்தாலேயே, காலை உணவுத்திட்டத்தை செயல்படுத்த முனைப்பு காட்டினார்கள். ஆனால், அதிகாரிகள் சுட்டிக்காட்டிய நிதிச் சுமையால் அவர்களால் முடிவெடுக்க முடியவில்லை. இருந்தபோதும், குழந்தைகளின் பசிப்பிணி போக்குவதே அரசின் அடிப்படை கடமை என்ற நோக்கத்தில் காலை உணவுத்திட்டம் என்ற புரட்சிகர திட்டத்தை சலனமில்லாமல் உறுதியாக தொடங்கி வரலாற்றில் இடம்பிடித்துள்ளார் முத்துவேல் கருணாநிதி ஸ்டாலின். இந்த திட்டத்தின்மூலம், மாணவர்களின் பள்ளி வருகை அதிகரிக்கும், பசி போக்கப்படும், ஊட்டச்சத்து குறைபாடு குறையும், கற்றல் திறன் மேம்படும், கல்வி மேம்படும். நாட்டுக்கே முன்னோடியான இந்த திட்டத்தை எதிர்காலத்தில் நாடு முழுமைக்கும் கொண்டு வருவதற்கான முயற்சிகளை ஒன்றிய அரசும் எடுக்கக்கூடும்.