திருவனந்தபுரம்: டோவினோ தாமஸ் நடித்துள்ள மலையாள படத்துக்கான சப் டைட்டிலை மாற்றிவிட்டதாக ஓடிடி நிறுவனம் மீது புகார் கூறப்பட்டுள்ளது. டோவினோ தாமஸ், கல்யாணி பிரியதர்ஷன் நடித்துள்ள மலையாள படம் தள்ளுமால. காலித் ரஹ்மான் இந்த படத்தை இயக்கியுள்ளார். இந்த படம் தியேட்டர்களில் வெளியானது. தொடர்ந்து இப்போது நெட்பிளிக்சில் வெளியாகியுள்ளது. படத்தின் சப் டைட்டில், படத்தில் இடம்பெறும் வசனங்களை மொழி மாற்றம் செய்வது போல் இல்லை என குற்றச்சாட்டு எழுந்தது. ரசிகர்கள் சொன்ன இந்த விஷயத்தை படக்குழு கவனித்தது. அப்போது படத்தின் வசனத்துக்கும் ஆங்கில சப்டைட்டிலுக்கும் தொடர்பு இல்லாமல் இருப்பது தெரிந்தது. பல இடங்களில் வசனங்களை மாற்றிவிட்டதாக கூறப்படுகிறது.
இது பற்றி படக்குழுவினர் கூறும்போது, “மலையாளத்தில் இடம்பெறும் வார்த்தைகளுக்கு ஏற்ற ஆங்கில வார்த்தைகளை தேர்ந்தெடுத்து சப்டைட்டிலுக்கான வசனங்களை எழுதியுள்ளோம். கதாசிரியரின் ஒப்புதலுடன் தான் ஓடிடிக்கு அவற்றை வழங்கினோம். ஆனால் இப்போது அவற்றில் மாற்றம் செய்யப்பட்டு இருப்பதை பார்க்கும் போது அதிர்ச்சியாக இருக்கிறது. சில வார்த்தைகள் அந்த காட்சியின் அர்த்தத்தையே மாற்றிவிடும் விதமாக இடம் பெற்றிருக்கின்றன’ என தெரிவித்தனர். இதையடுத்து ஓடிடி நிறுவனத்துடன் பட தயாரிப்பு தரப்பு இது பற்றி பேசி வருவதாக தெரிவிக்கப்பட்டுள்ளது.