தெலங்கானா மாநிலத்தில் மத்திய உள்துறை அமைச்சர் அமித் ஷா பாதுகாப்பில் குளறுபடி ஏற்பட்ட சம்பவம் அதிர்ச்சியை ஏற்படுத்தி உள்ளது.
பாஜக மூத்தத் தலைவரும், மத்திய உள்துறை அமைச்சருமான அமித் ஷா, நேற்று முன்தினம் மாலை முதல் தெலங்கானா மாநிலத்தில் பல்வேறு நிகழ்ச்சிகளில் பங்கேற்று வந்தார். நேற்று அவர் ஹைதராபாத் அருகே பேகம்பேட்டில் உள்ள ஓட்டல் ஒன்றுக்கு சென்றார்.
அப்போது, உள்துறை அமைச்சர் அமித் ஷாவின் வாகன அணிவகுப்பு அந்த ஓட்டலுக்கு உள்ளே நுழைய முயன்ற போது, வழியில் இடையூறாக மர்ம கார் ஒன்று நிறுத்தப்பட்டு இருந்தது. இதனால் அமைச்சர் அமித் ஷாவின் வாகன அணிவகுப்பு அங்கேயே நிறுத்தப்பட்டது. பின்னர், அந்த மர்ம காரை பாதுகாவலர்கள் அப்புறப்படுத்தினர். அந்த கார், ஆளும் தெலங்கானா ராஷ்ட்ரீய சமிதி தலைவர் ஒருவருக்கு சொந்தமானது என கண்டறியப்பட்டு உள்ளது.
இசட் பிளஸ் பிரிவு பாதுகாப்பில் இருக்கும் மத்திய உள்துறை அமித் ஷாவின் வாகன பாதையில், காரை நிறுத்தி, அவரது பாதுகாப்பில் குளறுபடியை ஏற்படுத்தி உள்ள விவகாரம், தெலங்கானா மாநிலத்தில் அதிர்ச்சியை ஏற்படுத்தி உள்ளது. இந்த சம்பவம் தொடர்பாக போலீசார் விசாரணை நடத்தி வருகின்றனர்.
ஏற்கனவே, மகாராஷ்டிர மாநிலத்தில் உள்துறை அமைச்சர் அமித் ஷாவின் பாதுகாப்பு அதிகாரிகளில் ஒருவர் சந்தேகத்திற்கு இடமாக இருந்தது சர்ச்சையை ஏற்படுத்தி இருந்தது. இந்நிலையில், தெலங்கானா மாநிலத்தில் அமைச்சர் அமித் ஷா பாதுகாப்பில் குளறுபடி ஏற்பட்டுள்ளது, பரபரப்பை ஏற்படுத்தி உள்ளது.