டெல்லி சென்றுள்ள , தனது முடிவில் உறுதியாக இருப்பதை வெளிப்படுத்தி இருப்பதாக தகவல் வெளியாகி உள்ளது.
பரபரப்பான அரசியல் சூழ்நிலைகளுக்கு இடையே, அதிமுக இடைக்காலப் பொதுச் செயலாளரும், எதிர்க்கட்சித் தலைவருமான எடப்பாடி பழனிசாமி தலைநகர் டெல்லிக்கு சுற்றுப்பயணம் மேற்கொண்டு உள்ளார். அதிமுக ஒற்றைத் தலைமையாக பொறுப்பேற்ற பிறகு, இரண்டாவது முறையாக, அவர் டெல்லிக்கு சென்றுள்ளார்.
எனினும் இந்த முறை, டெல்லி பயணம், அவருக்கு மிகவும் முக்கியத்துவம் வாய்ந்ததாகப் பார்க்கப்படுகிறது. காரணம், டெல்லியில் இருந்து எடப்பாடி பழனிசாமிக்கு அழைப்பு வந்துள்ளது. பிரதமர் நரேந்திர மோடி, மத்திய உள்துறை அமைச்சர் அமித் ஷா உள்ளிட்ட பாஜக மூத்தத் தலைவர்களிடம் இருந்து எப்போது அழைப்பு வரும் என எதிர்பார்த்து காத்திருந்த அவருக்கு இது நல் வாய்ப்பாக அமைந்துள்ளது.
இந்நிலையில் இன்று, டெல்லியில், பாஜக மூத்தத் தலைவரும், மத்திய உள்துறை அமைச்சருமான அமித் ஷாவை, அதிமுக இடைக்காலப் பொதுச் செயலாளர் எடப்பாடி பழனிசாமி சந்தித்துப் பேசினார். சுமார் அரை மணி நேரத்திற்கும் நடைபெற்ற இந்த சந்திப்பில், தமிழக அரசியல் நிலவரம், அதிமுக – பாஜக கூட்டணி, நாடாளுமன்ற மக்களவைத் தேர்தல் உள்ளிட்ட பல முக்கிய விவகாரங்கள் குறித்து விவாதிக்கப்பட்டதாக தகவல் வெளியாகி உள்ளது. இந்த சந்திப்புக்கு பிறகு செய்தியாளர்களிடம் பேசிய எடப்பாடி பழனிசாமி, “உள்துறை அமைச்சர் அமித் ஷா உடன், அரசியல் பேசவில்லை,” என, தெரிவித்தார்.
இதற்கிடையே, நேற்றிரவு டெல்லியில் தங்கி இருந்த எடப்பாடி பழனிசாமியை, பாஜக மூத்தத் தலைவர்கள் சிலர் சந்தித்து பேசியதாகவும், அப்போது, ஓ.பன்னீர்செல்வத்துடன் இணைந்து செயல்படும்படி அவர்கள் அறிவுறுத்தியதாகவும் கூறப்படுகிறது.
எதிர் வரும் நாடாளுமன்ற மக்களவைத் தேர்தலில், ஓட்டுகள் சிதறக் கூடாது என்பதற்காக, ஓ.பன்னீர்செல்வத்துடன் இணைந்து பணியாற்றும்படி, எடப்பாடி பழனிசாமியிடம் வலியுறுத்தியதாகக் கூறப்படுகிறது. பொறுமையாக கேட்டுக் கொண்ட எடப்பாடி பழனிசாமி, தனது முடிவில் உறுதியாக இருப்பதாகத் தெரிவித்து உள்ளார்.
இதன் தொடர்ச்சியாகவே, இன்று, அதிமுக ஒற்றைத் தலைமை விவகாரம் குறித்து, மத்திய உள்துறை அமைச்சர் அமித் ஷாவுடன், எடப்பாடி பழனிசாமி பேசி உள்ளார். அப்போது, ஒற்றைத் தலைமை விவகாரத்தில் தனது முடிவை அவர் உறுதிப்பட தெரிவித்து விட்டதாகக் கூறப்படுகிறது.
செய்தியாளர்கள் சந்திப்பில் கூட, ஓ.பன்னீர்செல்வம் குறித்த கேள்வியை, எடப்பாடி பழனிசாமி புறக்கணித்தது குறிப்பிடத்தக்கது. ஒருங்கிணைந்த அதிமுகவையே டெல்லி பாஜக மேலிடத் தலைவர்கள் விரும்பும் நிலையில், எடப்பாடி பழனிசாமி பிடிவாதம் பிடிப்பது, பரபரப்பை ஏற்படுத்தி உள்ளது.