“தேர்தலில் வெற்றி பெறுவது குறித்து மட்டுமே தேர்ந்தெடுக்கப்பட்ட மக்கள் பிரதிநிதிகள் யோசிக்கக் கூடாது,” என, பாஜக மேயர்களுக்கு, பிரதமர் நரேந்திர மோடி அறிவுரை வழங்கி உள்ளார்.
குஜராத் மாநிலம் காந்தி நகரில், பாஜக மேயர்கள் பங்கேற்கும் இரண்டு நாள் மாநாடு இன்று காலை துவங்கியது. 18 மாநிலங்கள் மற்றும் யூனியன் பிரதேசங்களில் இருந்து, பாஜக ஆளும் நகர்ப்புற உள்ளாட்சி அமைப்புகளின், 118 மேயர்கள் மற்றும் துணை மேயர்கள் இதில் கலந்து கொண்டுள்ளனர். இந்த மாநாட்டை ‘வீடியோ கான்பரன்ஸ்’ மூலம் தொடங்கி வைத்த பிரதமர் நரேந்திர மோடி, மேயர்களுடன் கலந்துரையாடினார்.
அப்போது, பிரதமர் மோடி பேசியதாவது:
சர்தார் வல்லபாய் படேல் மேயராக தான் தனது பயணத்தை துவங்கினார். சிறந்த இந்தியாவிற்கான அவரது பாதையை நாம் பின்பற்றி, வளர்ச்சிக்காக உழைக்க வேண்டும். இரண்டாம் மற்றும் மூன்றாம் தர நகரங்களும் இப்போது பொருளாதார நடவடிக்கைகளின் மையமாக மாறி வருகின்றன. அந்த பகுதிகளில் தொழில் கட்டமைப்பை வளர்ப்பதில் கவனம் செலுத்த வேண்டும். சிறு, குறு விற்பனையாளர்களும் டிஜிட்டல் பணப்பரிவர்த்தனை முறையை பயன்படுத்துவது குறித்து பயிற்சி பெறுவதை மேயர்கள் உறுதி செய்ய வேண்டும்.
அடிமட்டத்தில் இருந்து பணியாற்றுவது அனைத்து மேயர்களின் பொறுப்பாகும். சிறந்த வசதிகள் வழங்கப்பட வேண்டும். அதே போல் வளர்ச்சி நன்கு திட்டமிடப்பட வேண்டும். தேர்தலில் வெற்றி பெறுவது குறித்து மட்டுமே தேர்ந்தெடுக்கப்பட்ட மக்கள் பிரதிநிதிகள் யோசிக்கக் கூடாது. தேர்தலை மையமாக வைத்து நகரத்தை மேம்படுத்த முடியாது. பல நேரங்களில், நகரங்களுக்கு நன்மை பயக்கும் முடிவுகள் எடுக்கப்படுவதில்லை.
2014 ஆம் ஆண்டின் 250 கிலோ மீட்டருக்கு குறைவாக மெட்ரோ ரயில் பாதைகள் உருவாக்கப்பட்டிருந்தது. தற்போது 775 கிலோ மீட்டருக்கு அதிகமாக உருவாக்கப்பட்டு உள்ளது. நகர்ப்புற திட்டமிடல் மற்றும் செயற்கைக்கோள் நகரங்களை உருவாக்குதல் மற்றும் பெரிய நகரங்களின் சுமையை குறைக்க அடுக்கு 2 மற்றும் அடுக்கு 3 நகரங்களை உருவாக்குதல் ஆகியவற்றில் கவனம் செலுத்த வேண்டும்.
நீங்கள் அனைவரும் எதிர்காலத்தைப் பற்றி சிந்திக்க வேண்டும். நகர்ப்புற திட்டமிடல் தற்காலிகமாக இருக்கக் கூடாது. கொள்கைகளை உருவாக்குவதன் மூலம் நகர்ப்புற திட்டமிடலை தரப்படுத்தலாம். தோட்டங்கள் போன்ற பொதுச் சொத்துகளைப் பராமரிப்பதில் மக்களின் பங்களிப்பை அதிகரிக்க வேண்டும்.
பாரம்பரியம், வரலாறு மற்றும் நகரத்தின் தனித்துவத்தை வெளிப்படுத்தும் வகையில் “நகர அருங்காட்சியகம்” அமைப்பது குறித்து மேயர்கள் சிந்திக்க வேண்டும். மேயர்கள் தங்கள் யோசனைகள் மற்றும் சிறந்த நடைமுறைகளைப் பகிர்ந்து கொள்ள பொதுவான வாட்ஸ்அப் குழுவை உருவாக்க வேண்டும்.
இவ்வாறு அவர் பேசினார்.