போட்டிகள் அதிகம் நிறைந்த இந்த நவீன உலகில் மாணவர்கள் எதிர்காலத்தில் வெற்றிகரமானவர்களார வலம்வர பள்ளி ஆண்டு பொதுத் தேர்வில் அதிக மதிப்பெண்களை பெறுவது அடிப்படையாக கருதப்படுகிறது. இதன் காரணமாகவே மதிப்பெண்ணை மையமாக கொண்டே சுழலும் மாணவர்களின் உலகில், பெரியோரை மதித்தல், தோல்விகளை எப்படி எதிர்கொள்வது, மனித உறவுகளின் மதிப்பு போன்ற வாழ்வின் முக்கியமான விழுமியங்கள் அவர்களுக்கு தெரியாமலேயே போய்விடுகின்றன.
அத்துடன் எக்ஸாம்.. மார்க்… என்றே மாணவர்கள் தொடர்ந்து செயல்பட்டு வருவதால், அவர்கள் இனம்புரியாத மனஅழுத்தத்துக்கு ஆளாகினர். தோல்விகளை வெற்றிகரமாக எதிர்கொள்ளும் மனநிலை வளர்த்து கொள்வதற்கு பதிலாக மனஅழுத்தத்துக்கு ஆளாகும் மாணவர்கள், ஒருகட்டத்தி்ல் தற்கொலை போன்ற விபரீத முடிவுகளை எடுக்கும் நிலைக்கு தள்ளப்படுகின்றனர்.
மாணவர்களின் இந்த அவலநிலையை மாற்றி வாழ்க்கையை அவர்கள் வெற்றிகரமாக எதிர்கொள்ள அவர்களை மனதளவில் தயார் செய்ய தமிழக அரசு பல்வேறு நடவடிக்கைகளை எடுத்து வருகிறது.
இதில் முக்கிய அம்சமாக, அரசு மற்றும் அரசு உதவிப்பெறும் பள்ளிகளில் பயிலும் 6 முதல் 9 ஆம் வகுப்பு வரையிலான மாணவர்களுக்கு இனி கலை, பண்பாட்டு பாடங்களும் கட்டாயம் என்று பள்ளிக் கல்வித் துறை அதிரடியாக உத்தரவிட்டுள்ளது.
இயல், இசை, நாடகம், நடனம், நாட்டுப்புற கலை, காட்சிக் கலை உள்ளிட்ட கலை, பண்பாட்டு செயல்பாடுகளில ஏதேனும் ஒன்றை மாணவர்கள் தேர்ந்தெடுக்க வேண்டும் எனவும், இந்த செயல்பாடுகளில் பங்கேற்பதற்காக அவர்களின் பள்ளஇ கால அட்டவணையில் வாரத்துக்கு இரண்டு வகுப்புகள் ஒதுக்கப்பட வேண்டும் என்று அரசு உத்தரவிட்டுள்ளது.
extra curricullam activities எனப்படும இந்த பாடங்களை மாணவர்களுக்கு சிறப்பாக போதிக்க இத்துறைகளில் நிபுணத்துவம் வாய்ந்த கலைஞர்களை பள்ளி நிர்வாகங்கள் பயன்படுத்திக் கொள்ளவும் இதில் அடக்கம். இதில் ஏதேனும் ஒன்றை மாணவர்கள் தேர்ந்தெடுத்துக் கலந்துகொள்ள வேண்டும். கலை, பண்பாட்டு செயல்பாடுகளில் சிறந்து விளங்கும் மாணவர்கள் வெளிநாடுகளுக்கு அழைத்துச் செல்லப்படுவர்.
இந்தத் திட்டத்துக்கு அருகில் உள்ள கலைஞர்களைப் பயன்படுத்திக்கொள்ளவும் அறிவுறுத்தப்பட்டுள்ளது. மேலும் கவை, பண்பாட்டு வகுப்புகளில சிறந்து விளங்கும் மாணவர்கள் வெளிநாடுகளுக்கு சுற்றுலா அழைத்துச் செல்லப்படுவார்கள் எனவும் அரசு ஆசைக் காட்டியுள்ளது.
மாணவர்களின் மன அழுத்தத்தை குறைத்து, அவர்களை பன்முகத் திறமை கொண்டவர்களாகவும், படிப்பை தாண்டி அவர்களின் தனித்திறனை வளர்க்கும் நோக்கிலும் கொண்டு வரப்பட்டுள்ள இந்த திட்டத்துக்கு பல்வேறு தரப்பிலும் நல்ல வரவேற்பு கிடைக்கும் என்று பள்ளிக் கல்வித் துறை அதிகாரிகள் நம்பிக்கை தெரிவித்துள்ளனர்.
முன்னதாக, நடப்பு கல்லியாண்டு (2022 -23) முதல, 6- 10 வகுப்பு வரையிலான மாணவர்களுக்கு வார ஒருமுறை நீதி போதனைகள் வகுப்புகள் கட்டாயமாக்கப்பட்டுள்ள நிலையில், தற்போது கலை, பண்பாட்டு வகுப்புகள் கட்டாயமாக்கப்பட உள்ளது குறிப்பிடத்தக்கது.
கூட்டு குடும்பங்கள் குறைந்து, தனி குடும்பங்கள் அதிகரித்துள்ள இன்றைய நவீனகால வாழ்க்கை சூழலில் வீட்டில் தாத்தா, பாட்டிகளிடம் நீதிக் கதைகளை கேட்கும் வாய்ப்பை இழந்துள்ள இந்த தலைமுறை மாணவர்களுக்கு பள்ளிக் கல்வித் துறையின் இதுபோன்ற நடவடிக்கைகள் மிகவும் முக்கியத்துவம் வாய்ந்ததாக கருதப்படுகிறது.