கோவையில் எஸ்டிபிஐ நிர்வாகியும், இந்து முன்னணியினை சேர்ந்த நிர்வாகிகளும் மோதலில் ஈடுபட்டது பெரும் பரபரப்பை ஏற்படுத்தியுள்ளது.
நேற்று கோவையில் பாஜக அலுவலகத்தில் பெட்ரோல் குண்டு வீசப்பட்ட சம்பவம் தொடர்பான பரபரப்பு அடங்குவதற்கு முன்பாக இன்று இந்த மோதல் சம்பவம் நடந்துள்ளது பெரும் பரபரப்பை கிளப்பியுள்ளது. இதை அடிப்படையாக வைத்து காவல் துறையினர் விசாரணை நடத்தி வருகின்றனர்.
எஸ்.டி பி ஐ கட்சியை சேர்ந்த ஜாபர், கோவை கண்ணப்பநகர் பகுதியில் தனது இரு சக்கர வாகனத்தில் நின்று கொண்டிருந்துள்ளார். அப்போது அங்கு ஜாபருக்கும் அதே பகுதியில் உள்ள இந்து முன்னனியை சேர்ந்த விக்னேஷ் என்பவருக்கும் கடும் வாக்குவாதம் நிலவியுள்ளது. இதனையடுத்து இருவரும் மாறி மாறி மோதிக்கொண்டனர். இதனால் இருவருக்குமே பலத்த காயம் ஏற்பட்டது. மேலும் ஜாபரின் இருசக்கர வாகனமும் கல்லால் அடித்து நொறுக்கப்பட்டன.
இதனையடுத்து அங்கு இருந்த பொது மக்கள் இரு தரப்பினரையும் பிரித்துகோவை அரசு மருத்துவமனையில் சிகிச்சைக்காக அனுப்பிவைத்தனர். தொடர்ந்து ஜாபரின் குடும்பத்தினர்கள் , உறவினர்கள் என சுமார் 25 பேர் சாலைமறியலில் ஈடுபட முயன்றனர். இதனையடுத்து அங்கு வந்த ரத்தினபுரி காவல் துறையினர் சமரசம் செய்ததை அடுத்து அவர்கள் கலைந்து சென்றனர்.
மேலும் இருவரும் மோதிக்கொண்டது குறித்துபோலீசார் விசாரணை நடத்தி வருகின்றனர். ஏற்கனவே பாஜக மற்றும் இந்து முன்னணியை சேர்ந்த வாகனங்கள் மீது தாக்குதல் மற்றும் பெட்ரோல் குண்டு வீச்சு சம்பவத்தால் கோவையில் பெரும் பரபரப்பு சூழ்நிலை ஏற்பட்டுள்ள நிலையில் தற்போது எஸ்டிபிஐ நிர்வாகியும் இந்து முன்னணி நிர்வாகியும் மோதிக்கொண்ட சம்பவத்தால் பதட்டமான நிலை ஏற்பட்டுள்ளது.