சென்னை பெரியார் திடலில், ‘60 ஆண்டுகால விடுதலை ஆசிரியருக்கு கழகத் தோழர்கள் விடுதலை சந்தா வழங்கும் விழா’ என்கிற தலைப்பில் திராவிடர் கழகத்தால் கூட்டம் ஒன்று கடந்த 6ஆம் தேதி நடைபெற்றது. அதில் கலந்து கொண்டு பேசிய
துணைப் பொதுச்செயலாளரும், எம்.பி.யுமான ஆ.ராசா, பல்வேறு விஷயங்கள் குறித்துப் பேசினார்.
குறிப்பாக, யாரெல்லாம் இந்துக்கள் என அவர் தெரிவித்த சில கருத்துகள் சர்ச்சையானது. அதாவது, மனுஸ்மிருதியில் சூத்திரர்களும் பஞ்சமர்களும் எவ்வாறு வகைபடுத்தப்பட்டு இருக்கிறார்கள் என்பதை அவர் விளக்கிப் பேசினார். இதற்கு பாஜக மற்றும் இந்து அமைப்புகள் கடுமையாக எதிர்ப்பு தெரிவித்து வருகின்றன. ஆ.ராசா மீது பல்வேறு காவல்நிலையங்களில் புகார்கள் கொடுக்கப்பட்டுள்ளன. இந்துக்களை விபசாரி மகன் என்று ஆ.ராசா கூறியதாக குற்றம் சாட்டும் அவர்கள், ஆ.ராசா மன்னிப்பு கேட்க வேண்டும் எனவும் வலியுறுத்தி வருகின்றனர்.
ஆனால், நான் ஏன் மன்னிப்பு கேட்க வேண்டும்; மனுஸ்மிருதி சொல்லப்பட்ட கருத்துக்களைத்தான் சொன்னேன் என்று தெரிவித்துள்ள ஆ.ராசா, நீதிமன்றம் சென்று வழக்கு தொடரட்டும். ஆதாரங்களோடு காட்டி தோலுறிக்கிறேன் எனவும் பதிலடி கொடுத்துள்ளார்.
இந்த பின்னணியில், ஆ.ராசா விவகாரத்தில் திமுகவினரே உள்ளடி வேலை பார்த்தது குறித்த தகவல் முதல்வர் ஸ்டாலின் காதுகளுக்கு சென்றுள்ளதாக தெரிகிறது. ஆ.ராசாவை கண்டித்து கடந்த 20ஆம் தேதி கடையடைப்பு போராட்டத்துக்கு இந்து முன்னணி அழைப்பு விடுத்திருந்தது. இதனை திமுக அரசு பெரிதாக எடுத்துக் கொள்ளவில்லை. ஆளுங்கட்சியாக இருக்கும் போது, இந்து முன்னணி விடுக்கும் அழைப்புகளுக்கு யாரும் செவி சாய்க்க மாட்டார்கள் என திமுக நினைத்ததே இதற்கு காரணம் என்கிறார்கள். ஆனால், திமுக நினைத்ததற்கு மாறாக, இந்து முன்னணி நடத்திய கடையடைப்பு கிட்டத்தட்ட வெற்றி என்ற நிலையில் அவர்கள் கொண்டாடினர். இந்த போராட்டத்தை தடுக்க திமுக தரப்பு தீவிரமாக முயற்சி செய்யவில்லை. முதல்வர் ஸ்டாலின் கட்டுப்பாட்டில் உள்ள காவல்துறையும் தீவிரமாக செயல்பட்டது போலத் தெரியவில்லை என்ற விமர்சனங்களுக்கெல்லாம் இந்த போராட்டம் வெற்றி பெறாது என ஆளும் தரப்பு நினைத்ததே காரணம் என்கிறார்கள்.
உண்மையில் கள நிலவரம் இந்து முன்னணிக்கு வெற்றியாகவே பார்க்கப்படுகிறது. குறிப்பாக, ஆ.ராசாவின் சொந்த தொகுதியான நீலகிரியிலும் கூட பெரும்பாலான கடைகள் அடைக்கப்பட்டே இருந்தன. இதுகுறித்து விசாரிக்க முதல்வர் ஸ்டாலின் உத்தரவிட்டதையடுத்து களத்தில் இறங்கிய உளவுத்துறை, தகவல்களை அலசி ஆராய்ந்து முதல்வருக்கு நோட் வைத்துள்ளது. இந்து முன்னணி அமைப்பு முன்னின்று போராட்டத்தை நடத்த பாஜகவினர் பின்னணியில் மிகப்பெரிய சப்போர்ட் செய்துள்ளனராம்.
மேலும், ஆ.ராசாவுக்கு எதிராக நீலகிரி தொகுதியில் சொந்த கட்சியினரே உள்ளடி வேலை பார்த்த தகவலையும் ரிப்போர்ட்டாக உளவுத்துறை சமர்ப்பித்துள்ளதாக தெரிகிறது. நீலகிரி தனி தொகுதி என்பதால், பெரம்பலூரில் இருந்து இங்கு வந்த ஆ.ராசா கோலோச்சுவதை சொந்த கட்சியினரே விரும்பவில்லையாம். தனது ஆதரவாளர்களுக்கு தேர்தல்களில் சீட் வாங்கித்தருவது, பதவிகளை வாங்கி தருவது போன்ற காரணங்களுக்காக ஆ.ராசா மீது கோபத்தில் இருந்த நீலகிரி திமுகவினர், இதுதான் சந்தர்ப்பம் என வியாபார சங்கத்தினருடன் திரைமறைவில் பேசி கடைகளை அடைக்க வைத்துள்ளதாக மேலிடத்துக்கு உளவுத்துறை நோட் வைத்துள்ளதாக தகவல்கள் வெளியாகியுள்ளன.
ஆ.ராசாவின் பேச்சுக்கு ஆதரவாக திமுக தலைவர்கள் யாரும் பகிரங்கமாக பேசியதாக தெரியவில்லை. இருந்தபோதும், முதல்வர் ஸ்டாலினின் குட்புக்கிலேயே ஆ.ராசா இருப்பதாக கூறுகிறார்கள். அதனாலேயே, போராட்டம் குறித்து ஸ்டாலின் ரிப்போர்ட் வாங்கியுள்ளாராம். அதன்படி, அடுத்தக்கட்ட நடவடிக்கைகள் இருக்கலாம் என்கிறார்கள்.