ராஜஸ்தான் மாநிலத்தின் புதிய முதலமைச்சராக, சச்சின் பைலட்டை தேர்வு செய்யக் கூடாது என, முதலமைச்சர் அசோக் கெலாட் ஆதரவு எம்எல்ஏக்கள் போர்க்கொடி தூக்கி உள்ளனர்.
ராஜஸ்தான் மாநிலத்தில், முதலமைச்சர் அசோக் கெலாட் தலைமையிலான காங்கிரஸ் கட்சியின் ஆட்சி நடைபெற்று வருகிறது. இந்த மாநிலத்தில் அடுத்த ஆண்டு இறுதியில் சட்டப்பேரவைத் தேர்தல் நடைபெற உள்ளது. இந்நிலையில், வரும் அக்டோபர் மாதம் 17 ஆம் தேதி நடைபெற உள்ள அகில இந்திய காங்கிரஸ் கட்சித் தலைவர் பதவிக்கான தேர்தலில், ராஜஸ்தான் மாநில முதலமைச்சர் அசோக் கெலாட் போட்டியிட உள்ளார். சோனியா காந்தி குடும்பத்தின் ஆதரவு இருப்பதால், காங்கிரஸ் தலைவராக தேர்வு செய்யப்பட இவருக்கு ஆதரவு இருப்பதாகக் கூறப்படுகிறது.
காங்கிரஸ் கட்சியில், அண்மையில் தீர்மானிக்கப்பட்ட முடிவின்படி, ஒருவர் ஒரு பதவியில் மட்டுமே நீடிக்க முடியும். அதன்படி, காங்கிரஸ் தலைவர் தேர்தலில் அசோக் கெலாட் வெற்றி பெற்றால், ராஜஸ்தான் மாநில முதலமைச்சர் பதவியில் தொடர முடியாது. இதை அடுத்து, ராஜஸ்தான் மாநிலத்தின் புதிய முதலமைச்சரை தேர்வு செய்வதற்காக காங்கிரஸ் எம்எல்ஏக்கள் கூட்டம், தலைநகர் ஜெய்ப்பூரில் நேற்று நடைபெற்றது. இதில், மூத்தத் தலைவர்கள் மல்லிகார்ஜூன கார்கே, அஜய் மக்கான் உள்ளிட்டோர் பார்வையாளர்களாக பங்கேற்றனர்.
கடந்த சில ஆண்டுகளுக்கு முன்பு, முதலமைச்சர் அசோக் கெலாட்டிற்கு எதிராக போர்க்கொடி தூக்கிய சச்சின் பைலட், முதலமைச்சராக தேர்வு செய்யப்பட இருப்பதாக தகவல் வெளியாகியது. இதனால் கடும் அதிருப்தி அடைந்த முதலமைச்சர் அசோக் கெலாட் ஆதரவு எம்எல்ஏக்கள், “சச்சின் பைலட்டை முதலமைச்சராக தேர்வு செய்யக்கூடாது; சில ஆண்டுகளுக்கு முன்பு, ஆட்சியை கவிழ்த்து விடுவேன் என மிரட்டியவர் அவர். எனவே, முதலமைச்சர் அசோக் கெலாட் ஆதரவாளர்களான நம்மில் ஒருவரை முதலமைச்சராக தேர்வு செய்ய வேண்டும். இல்லை எனில், நாங்கள் அனைவரும் ராஜினாமா செய்து விடுவோம்” என அவர்கள் மிரட்டினர்.
எனினும், காங்கிரஸ் தலைமை எடுக்கும் முடிவுக்கு கட்டுப்படுவதாகவும் அவர்கள் உறுதி அளித்துள்ளனர். இது, ராஜஸ்தான் மாநில அரசியலில் புயலைக் கிளப்பி உள்ளது. இதற்கிடையே, காங்கிரஸ் எம்எல்ஏக்களின் கருத்துக்களை தனித்தனியாக கேட்டறிந்த மூத்தத் தலைவர்கள் மல்லிகார்ஜூன கார்கே, அஜய் மக்கான், இது குறித்த அறிக்கையை, விரைவில், சோனியா காந்தியிடம் வழங்க தலைநகர் டெல்லிக்கு விரைந்துள்ளனர். சச்சின் பைலட் முதலமைச்சராக தேர்வு செய்யப்பட்டால், ராஜஸ்தான் மாநில காங்கிரஸ் கட்சியில் நிச்சயமாக குழப்பம் ஏற்படும் என்றும் அரசியல் நோக்கர்கள் கருத்துத் தெரிவித்து உள்ளனர்.