காங்கிரஸ் இடைக்காலத் தலைவர் சோனியா காந்தியை மூத்தத் தலைவர் கமல்நாத் சந்திக்க உள்ளதாகவும், ராஜஸ்தான் மாநில காங்கிரஸ் விவகாரத்தில் அவர் மத்தியஸ்தம் செய்ய இருப்பதாகவும் தகவல் வெளியாகி உள்ளது.
ராஜஸ்தான் மாநிலத்தில், முதலமைச்சர் அசோக் கெலாட் தலைமையிலான காங்கிரஸ் கட்சியின் ஆட்சி நடைபெற்று வருகிறது. இந்த மாநிலத்தில் அடுத்த ஆண்டு இறுதியில் சட்டப்பேரவைத் தேர்தல் நடைபெற உள்ளது.
இந்நிலையில், வரும் அக்டோபர் மாதம் 17 ஆம் தேதி நடைபெற உள்ள அகில இந்திய காங்கிரஸ் கட்சித் தலைவர் பதவிக்கான தேர்தலில், ராஜஸ்தான் மாநில முதலமைச்சர் அசோக் கெலாட் போட்டியிட உள்ளார். சோனியா காந்தி குடும்பத்தின் ஆதரவு இருப்பதால், காங்கிரஸ் தலைவராக தேர்வு செய்யப்பட இவருக்கு அதிக வாய்ப்பு இருப்பதாகக் கூறப்படுகிறது.
காங்கிரஸ் கட்சியில், அண்மையில் எடுக்கப்பட்ட கொள்கை முடிவின்படி, ஒருவர் ஒரு பதவியில் மட்டுமே நீடிக்க முடியும். அதன்படி, காங்கிரஸ் தலைவர் தேர்தலில் அசோக் கெலாட் வெற்றி பெற்றால், ராஜஸ்தான் மாநில முதலமைச்சர் பதவியில் தொடர முடியாது.
இதை அடுத்து, ராஜஸ்தான் மாநிலத்தின் புதிய முதலமைச்சரை தேர்வு செய்வதற்காக காங்கிரஸ் எம்எல்ஏக்கள் கூட்டம், ஜெய்ப்பூரில் நேற்று நடைபெற்றது. இதில், மூத்தத் தலைவர்கள் மல்லிகார்ஜூன கார்கே, அஜய் மக்கான் உள்ளிட்டோர் பார்வையாளர்களாக பங்கேற்றனர்.
கடந்த சில ஆண்டுகளுக்கு முன்பு, முதலமைச்சர் அசோக் கெலாட்டிற்கு எதிராக போர்க்கொடி தூக்கிய சச்சின் பைலட், முதலமைச்சராக தேர்வு செய்யப்பட இருப்பதாக தகவல் வெளியாகியது. இதனால் கடும் அதிருப்தி அடைந்த முதலமைச்சர் அசோக் கெலாட் ஆதரவு எம்எல்ஏக்கள், சச்சின் பைலட்டிற்கு எதிராக போர்க்கொடி தூக்கி உள்ளனர். இதனால் ராஜஸ்தான் மாநில அரசியலில் பரபரப்பு ஏற்பட்டு உள்ளது.
இந்நிலையில், காங்கிரஸ் இடைக்காலத் தலைவர் சோனியா காந்தியை, மத்திய பிரதேச மாநில முன்னாள் முதலமைச்சரும், மூத்தத் தலைவருமான கமல்நாத் சந்திக்க உள்ளதாக தகவல் வெளியாகி உள்ளது. அப்போது, ராஜஸ்தான் மாநில காங்கிரஸ் விவகாரத்தில், சச்சின் பைலட் – அசோக் கெலாட் தரப்பு இடையே மத்தியஸ்தம் செய்யும்படி, அவரிடம், சோனியா காந்தி கேட்க உள்ளதாகக் கூறப்படுகிறது.